Operes de proteziun cuntra l’ega: Rü de Fojedöra cun barieres de proteziun
Ti ultimi dis él gnü stlüt jö i laurs por fá sö les barieres de proteziun nöies dl Rü de Fojedöra sura Al Plan de Mareo. Al é jü debojëgn de cater loc por realisé le sistem de segurëza, che é metü adöm da cin barieres de proteziun. Indöt él gnü investí 940.000 euro.
Le rü jô cina dl 1972 cuntra Al Plan y passâ fora por le paîsc a ost. Chësta situaziun de prigo é gnüda mëndra tres la deviaziun dl rü cuntra süd. Dan da 10 agn á le Comun de Mareo lascé lauré fora n plan de raiuns tl prigo dal ofize tecnich Geoproject. Pro l’analisa dla probabilité de prigo dla zona interessada dl Rü de Fojedöra y Ciamaur él gnü fora che na pert dl paîsc d’Al Plan é te n raiun de gran prigo (bröm) resp. de prigo mesan (ghel). Sides le raiun produtif che ince le ciamp dal sport tla localité Ciamaur é aladô dl plan te n raiun de prigo cöce.
Ince en chësc ann á le rü desmostré la nöt di 7 d’agost tan prigorus che al é. Do che al ê gnü jö na roa é la strada cuntra Pederü romagnüda stlüta n valgügn dis. Al é jü debojegn de de gragn laurs por mëte indô a post la seziun de desciaria tl curs inferiur.
Tres la realisaziun dles barieres de proteziun pól sëgn gní ejaminé tl cheder dla elaboraziun dl plan de raiuns tl prigo nü por le Comun de Mareo la poscibilité de n arbassamënt dl prigo. Les barieres é danter cater y cin metri altes y rodunt 1295 metri lunges. La spona dlungia rü é gnüda renforzada cun de gran peres. La proietaziun y la direziun di laurs é gnüdes surantutes da Sandro Gius, a ce dl Ofize Sistemaziun de rüs da munt y paralovines ost. I laurs é gnüs fac dal capogrup Markus Passler y so grup de laur.
osp
Galaria dales fotografies
OSP/ Repartiziun Operes de proteziun cuntra l'ega
