Adatamënt reforma scolastica: Contlujiun sëres d’informaziun
Te döes incuntades, öna a Urtijëi y l’atra a San Martin, ti á i rapresentanc dla scora ladina presenté al personal didatich interessé l’adatamënt dla reforma scolastica „La Buona Suola“ ala normativa provinziala y les novités por le sistem scolastich ladin. Le proscim vare sará sëgn l’elaboraziun de n dessëgn dla lege da pert dla Junta provinziala adöm cun les trëi Intendënzes scolastiches.
Presenté les novités y le percurs dl adatamënt dla reforma statala tl setur scolastich ales normes provinziales y tó sö propostes d’integraziun: chisc é stá i dui obietifs prinzipai dles incuntades metüdes da jí dan da püch dal Departimënt Scora y Cultura Ladina a Urtijëi (03/12) y a San Martin (10/12). Ales döes sëres ál tut pert insegnanc de vigni livel de scora y ince n valügn geniturs. „Al é gnü informé y baié te n'atmosfera positiva, les domandes á ciafé respostes“, sotlignëia l’ispetur por les scores ladines Albert Videsott. „Tröpes domandes é gnüdes fates en cunt dle catedres verticales tla scora elementara cun insegnanc 'spezialisá' por l'insegnamënt dle materies musiga, inglesc, sport, sciöche ince en cunt dla valorisaziun dl sorvisc di insegnanc“, insciö Videsott.
La lege 107/2015 se tol dant de amplié l’autonomia dles scores cun la definiziun de n plann trienal dl’oferta formativa, da renforzé l’ativité de ajornamënt di insegnanc y da potenzié les competënzes di direturs y dles direturies dles scores. Na pert dles novités reverda la pert didatica, danter l’ater la poscibilité da adoré personal spezialisé tles scores elementares, por ejëmpl por les materies de sport, musiga y inglesc, aziuns cuntra l’arbandonn scolastich y l’introduziun de n portfolio personal de vigni studënt por documenté le percurs scolastich.
L’assessur Florian Mussner á sotligné che chëstes incuntades de informaziun fej pert de na rëi d’informaziun costanta cun i rapresentanc dl monn dla scora, „por informé sön les tematiches atuales che reverda le svilup dla didatica y organisaziun tles scores de nostes valades ladines.“ Do les sëres d’informaziun gnarál sëgn valuté la poscibilité de integré les domandes y propostes tl percurs de formaziun dla lege provinziala nöia. Le dessëgn de lege ti dess spo gní presenté tratan l’aisciöda 2016 al Consëi provinzial.
rc
Galaria dales fotografies
