Dala Junta: veicui eletrics, fossenares nöies
Na buna soluziun sce an ó se möie sön strada y ponsé tl medemo momënt ala sconanza dl ambiënt: la resposta é i veicui eletrics. Por sostigní chësta forma de mobilité á la Junta provinziala aprové incö (ai 15 de dezëmber), sön proposta dl assessur Florian Mussner, na convenziun cun le Ministere dles infrastrotöres y dl trasport por realisé fossenares nöies a Balsan, Auer, Tlüses y Porsenú.
„Le Südtirol ó deventé tres deplü na regiun model por ci che reverda le svilup de na mobilité sostenibla tl raiun alpin – sotlignëia l’assessur Florian Mussner – y por chësta rajiun é un de nüsc obietifs da sostigní tres deplü l’adoranza y la defujiun di auti eletrics.“ Por arjunje chësc fin á la Junta provinziala tut la dezijiun incö (ai 15 de dezëmber) da aprové na convenziun cun le Ministere dles infrastrotöres y di trasporc che prevëiga la realisaziun de fossenares por veicui eletrics a Balsan, Auer, Tlüses, Porsenú y Sterzing.
Le cost total de realisaziun dl proiet d’istalaziun dles staziuns de refornimënt é de püch deplü co 280mile euro, l’85 porcënt de chisc (240mile euro) gnará metüs a desposiziun tres le plann statal dles infrastrotöres dl Ministere competënt. La Provinzia de Balsan, che á tut pert ala bandida de concurs, messará insciö ma finanzié la pert che resta de 43mile euro.
Le proiet prevëiga implü la cumpra de n scooter eletrich da mëte a desposiziun al Safety Park de Pfatten, olache an podará porvé fora le scooter. La convenziun danter la Provinzia y le Ministere competënt gnará sotescrita tosc, la Junta á inciarié la STA (Strotöres Trasport Südtirol SpA) da coordiné la realisaziun dl proiet.
rc
