Dala Junta: finanziamënc de 1,8 miliuns al plann RAS sön la banda leria
Al vá inant le proiet dla Junta provinziala da amplié y potenzié la rëi dla banda leria tl Südtirol. Por completé le program che reverda i laurs preodüs tla perioda 2015-2016 á la Junta provinziala aprové incö (ai 15 de dezëmber) n finanziamënt surapró de 1,8 miliuns de euro por i intervënc dla RAS sön le teritore.
Cherié na rëi unica, daverta, capilara y publica che conzed coliamënc internet cun na velozité alta por impreses y families dl Südtirol: chësc é un di obietifs detlará dla Junta provinziala por ci che reverda la tecnologia dla banda leria, n setur te chël che al vëgn investí sön döt le teritore. Sön chësta fondamënta él ince gnü planifiché le program 2015-2016 elaboré dala RAS cun investimënc de completamënt dla rëi telematica. La Junta provinziala á incö (ai 15 de dezëmber) aprové n finanziamënt surapró de 1,8 miliuns de euro por laurs de prescia por la costruziun de POP y le completamënt de d’atres conesciuns dla rëi dla banda leria.
„La banda leria é na strotöra fondamentala por la competitivité – recorda le presidënt Arno Kompatscher – y al é assolutamënter nezesciar da colié ince les zones rurales ala rëi dl internet asvelt. L’Europa á sciöche obietif chël da garantí cina l’ann 2020 coliamënc internet asvelc al 50 porcënt dla popolaziun, cun la Talia che ó arjunje ti proscims cinch agn le fin da ti pité al 85 porcënt dla popolaziun azesc internet a 100 Mbit/s.“ Chisc traverc é ince contignüs tl’agenda „Südtirol digital 2020“ che é basada sön trëi pilastri: s’anuzé le plü che ara vá dles sinergies dl svilup dles infrastrotöres, adoré n mix de tecnologies a banda leria, pité mosöres de sostëgn concretes en colaboraziun cun i Comuns.“
rc
