Dala Junta: novités por trasses y tarifes di Nightliner tl 2016
„Fá a na manira che nüsc jogn pois rové zoruch a ciasa al sigü ince de nöt“: cun chëstes motivaziuns dl assessur Florian Mussner á la Junta provinziala dé incö (15 de dezëmber) süa aprovaziun al finanziamënt di Nightliner ince tl 2016, por 53 fins dl‘edema, te cinch raiuns. Al é preodü plü novités por ci che reverda les trasses y les tarifes.
Le sorvisc dles corieres dl Nightliner vëgn confermé inant cina ai 10 de dezëmber dl 2016 tles Comunités raionales cun ince la Val de Puster, la Val d’Isarch y Salto/Sciliar. „Al se trata de n’oferta dër aprijada nia ma dai jogn, mo ince dai geniturs – sotlignëia l’assessur Florian Mussner – deache al garantësc n iade zoruch a ciasa sigü ince tles ores de nöt por düc i fins dl’edema.“ I cosć de mantignimënt dl sorvisc é de püch sura un n miliun de euro, zirca 283mile euro gnará metüs a desposiziun dales Comunités raionales, sciöche ince dai Comuns de Ciastel y Fie. La pert de finanziamënt che resta de 626mile euro gnará garantis dala Provinzia.
Por le 2016 gnarál a se le dé ince n valgönes mudaziuns che reverda les trates: öna de chëstes é la realisaziun de n’architada implü tl percurs dl Nightliner dlungia i locai dl K1 de Bornech y dl Punka da Vierschach. Implü él preodü n adatamënt dles tarifes che ne é nia gnüdes mudades ti ultimi agns. Pian ia dai 18 de dezëmber dl 2015 costará öna na cherta 3 euro y 5 euro (les chertes pó gní cumprades sön la coriera). Al é ince preodü la poscibilité da cumpré pro i automac tles staziuns na cherta da 10 nöts por 30 euro. Por düc chi che á le Südtirol Pass o l’Abo+ él nezesciar da fá le check-in do che an é sentá sö sön bus. Sce an adora le Südtirol Pass o l’Abo+ plü iadi te öna na nöt gnarál registré le prisc de 5 euro por döta la nöt. Implü él ince poscibl da cumpré, tres le cunt personal dl Südtirol Pass, la cherta por 10 nöts por 30 euro. L’assessur Mussner á laldé la buna colaboraziun cun i Comuns y l’impëgn di rapresentanc di jogn por mioré le sorvisc.
rc
