Convëgn storich por recordé Karl Erckert, pröm Presidënt dla Provinzia
Cun n convëgn tl Palaz Widmann y intervënc de cater esperc de storia á la Provinzia recordé incö (ai 15 de dezëmber) a Balsan le pröm presidënt dla Junta Karl Erckert en gaujun dl aniversar di 60 agn da süa mort.
Karl Erckert é nasciü a Maran tl ann 1894 y é sté le pröm Presidënt dla Junta provinziala de Balsan, dal 1948 ai 15 de dezëmber dl 1955, canche al é mort tratan na sentada dla Junta. En ocajiun dl aniversar di 60 agn da süa mort á la Provinzia metü a jí n convëgn storich sön süa vita y la cariera politica dl pröm Presidënt dla Provinzia dl Südtirol. Sce Silvius Magnago á fat sö la ciasa dl’autonomia y Luis Durnwalder á salpü da nen fá adinfora n’abitaziun, é Karl Erckert sté le suranstant che á descurí le grunt por le frabicat y á messü le spartí adöm cun le vijin trentin: cun chësta imaja á le presidënt Kompatscher splighé l’aziun politica dl pröm Presidënt dla Provinzia.
L’assessuria provinziala Martha Stocker á daurí le convëgn tl Palaz Widmann cun n referimënt ince ala cultura dla recordanza y dla reconescënza: „La responsabilité y l’ademplimënt di dovëis é stá sciöche na vëta cocëna che á acompagné les aziuns dl pröm Presidënt, na personalité che ne ti á nia ma daurí al Südtirol la strada por la democrazia, mo che é sté bele tl tëmp amesa les veres y tratan la secunda vera mondiala n autur prinzipal dla vita politica locala“, á ajunté Stocker. Le relaziuns di esperc de storia Hans Heiss, Stefan Lechner, Andrea Di Michele y Eva Pfanzelter á aprofondí la porsona de Erckert da de plü prospetives: les carateristiches biografiches dla generaziun Erckert (Heiss), les tapes dla vita politica dl pröm Presidënt (Lechner) i dezenns 1918-1948 (Di Michele) y la fin dla vera (Pfanzelter).
En contlujiun á le möt dl pröm Presidënt, Karlheinz Erckert, recordé so pere sciöche porsona y nia sciöche autur politich. Dal convëgn él gnü fora la figöra de n aministradú ecuilibré cun n comportamënt balanzé che á acompagné süa cariera tresfora. „La funziun de mediaziun danter Dableiber y Optanten é un di miric prinzipai dl pröm Presidënt dla Provinzia che é gnü lité democraticamënter“, á recordé ince le presidënt Kompatscher. Süa esperiënza politica nes mostra che la storia ne é nia ma blancia o foscia, á ajunté Kompatscher, „mo che al é ince plü tonalités de grisc. Da les ciafé fora y da savëi da les manajé é la sfidada che i messun afronté ciaran a nosta storia mo ince a nostes aziuns da vigni de“, á stlüt jö le presidënt Kompatscher.
Imajes y audio
Imajes convëgn - http://we.tl/mszhHK0fh2
Intervista Kompatscher - http://we.tl/WgRfgJCfev
Intervista Stocker - http://we.tl/DFFc9fgBMg
File MP3 audio - http://we.tl/LU7EDgGMir
rc
Galaria dales fotografies
