Investimënc tl’assistënza sanitara de basa sön le teritore
Te süa ultima sentada á la Junta provinziala assegné i mesi finanziars por i proiec de investimënt tl’aziënda sanitara de basa sön le teritore. Al gnará ressaná y adatá plü raiuns cun ince la contlujiun dla sistemaziun dl zënter de cures paliatives tla strotöra de Martinsbrunn a Maran.
„L’importanza dl’assistënza sanitara sön le teritore gnará tres plü grana ti proscimi agn“, á sotligné l’assessuria provinziala por la sanité Martha Stocker. Al é insciö preodü da scomencé bele da sëgn inant i laurs nezesciars por le ressanamënt, l’adatamënt y le potenziamënt di raiuns sozio-sanitars cun n plann de planificaziun de plü agn. La Junta provinziala á insciö assegné i mesi finanziars por na seria de intervënc te chësc vers, che prevëiga danter l’ater l’ampliamënt dl raiun soziosanitar de Laives, la realisaziun de n raiun tla Alta Val d’Isarch y de un n raiun tl cuartier de Haslach a Balsan.
Danter i proiec él ince planifiché la manutenziun straordinara de plü raiuns sozio-sanitars, siöche por ejëmpl de chël de Tlüses y dles vijinanzes, y la contlujiun di laurs de sistemaziun dl zënter de cures paliatives Martinsbrunn a Maran. Le program prevëiga implü le start di intervënc tl raiun de Bornech y de chël de Maran.
rc
