Cursc de lingaz debann por porsones dejocupades
L’Aministraziun provinziala ti mët a desposiziun ales porsones zënza laur, cun pücies o degönes conescënzes dl secundo lingaz, na seria de bons debann por frecuenté cursc de ladin, todësch y talian.
Le marcé dl laur se damana tres deplü na maiú mobilité y flessibilité di lauranc, dij le diretur dl Ofize Educaziun permanënta de lingaz todësch Hubert Bertoluzza. Sovënz él indere ince la mancianza de conescënzes ti atri lingac, adöm ales competënzes soziales, che é i impedimënc plü gragn pro la chirida de n laur, sciöche sotrissé ince dal diretur dla Repartiziun Laur Helmuth Sinn.
Por chësta gaujia á l’Aministraziun provinziala metü a jí, tres le finanziamënt dales retüdes di ex aconsiadus regionai che á dé zoruch le paiamënt antizipé dles ponsiuns y dles cuotes metüdes da pert, na seria de mosöres de sostëgn por l’aprendimënt linguistich sot forma de bons debann por podëi frecuenté cursc por porsones dejocupades. I interessá pó fá domanda ai Zëntri Mediaziun dl laur competënc o al Ofize Educaziun permanënta (tel. 0471 413394, email sonja.logiudice@provincia.bz.it) o ince al Ofize Bi- y Trilinguism (tel. 0471 411271, email ivan.vangelista@provincia.bz.it).
rc
