Dala Junta: Löm vërda al program Interreg Talia-Austria cina al 2020
Do che la Comisciun europeica á aprové le program de cooperaziun nü danter la Talia y l’Austria, che tol ite ince la Provinzia de Balsan, á la Junta provinziala aprové incö (ai 12 de jená) la perioda de laur 2014 – 2020. Por finanzié proiec danter les Regiuns vijines él preodü zirca 98,4 miliuns de euro.
La Junta provinziala é gnüda lassura incö (ai 12 de jená) dla dezijiun dla Comisciun europeica da aprové le program de cooperaziun „INTERREG V-A TALIA AUSTRIA“ por la perioda 2014 – 2020. La Junta á de conseguënza inciarié les Repartiziuns provinziales competëntes da valuté i proiec che gnará presentá dai proponënc südtirolej y á istituí le Comité de suraverda nezesciar. Le presidënt dla Provinzia Arno Kompatscher sotescriará sëgn l’acordanza politica de cooperaziun transfrontaliera tl contest dl program Interreg V-A Talia-Austria elaboré dales sis Regiuns partezipantes che é: le Südtirol, le Venet, le Friul-Aunejia-Iulia y i Länder de Tirol, Kärnten y Salzburg.
Le program operatif nü é partí sö sön cater seturs de priorité por la cooperaziun söi proiec transfrontaliers: archirida y inovaziun, natöra y cultura, istituziuns, CLLD (svilup regional a livel local). Le program de cooperaziun tles arees de confin ó dantadöt promöie le svilup tecnologich, renforzé la competitivité dles pices impreses y de chëres mesanes y sconé le patrimone natural y cultural tres formes de n turism sostenibl. Interreg V-A Talia-Austria é implü le su program de cooperaziun europeich che sostëgn ince les politiches de svilup local de forma partezipativa (ince denominades CLLD) y che conscidrëia ince l’integraziun dla popolaziun locala ti prozesc de dezijiun sön le dagní dl teritore.
L’Interreg V podará s’anuzé de 98,4 miliuns de euro cina al 2020, de chisc vëgn l’85 porcënt dal Fonds europeich de svilup regional. La pert che resta é curida dal finanziamënt statal. Le start ofizial dla perioda de programaziun nöia dl Interreg V-A Talia Austria é preodüda por la fin de jená dl 2016 tl Palaz Widmann a Balsan, olache al gnará presenté i contignüs dl program Interreg 2020, les strategies de cooperaziun y les condiziuns damanades por ciafé n finanziamënt. Le pröm call de presentaziun di proiec é planifiché por le mëis de forá.
rc
