Dala Junta: A22 surandada a sozieté publica, ok al protocol d’intenüda
Sciöche bele la Regiun y la Provinzia de Trënt á ince la Provinzia de Balsan aprové incö (ai 12 de jená) le protocol d’intenüda por l’acordanza cun le Ministere dles Infrastrotöres y di Trasporc, bele verifiché a livel europeich, por renové la conzesciun dl’autostrada dl Prener. Le protocol d’intenüda gnará sotescrit da düc i sozi publics y dal Ministere en jöbia ai 14 de jená a Roma.
Sciöche la Regiun y la Provinzia de Trënt á ince la Provinzia de Balsan dé süa aprovaziun ala firma dl protocol d’intenüda por renové la conzesciun dl’autostrada dl Prener. Le contignü dl’intenüda é conesciü: le Ministere ti surandá la gestiun dl’A22 a na sozieté “in house” daldöt publica, cun na formula che prevëiga na conzesciun de trënt’agn cina le 2045 y 550 miliuns de euro dal fonds dla ferata, metüs sön na pert por finanzié le tunel de basa dl Prener y sües trasses d’azes. Le presidënt Arno Kompatscher y i atri rapresentanc dles sozietés publiches firmará l’acordanza cun le minister Graziano Delrio en jöbia ai 14 de jená a Roma. I detais dl’intenüda, adöm cun le program d’investimënc y d’intervënc, gnará presentá te na conferënza stampa en vëndres ai 15 de jená dales 12.00 a Trënt tla sënta dla Regiun.
“Ara se trata de n resultat storich por le Südtirol y le Trentin, che garantësc investimënc importanc por trënt'agn, mo dantadöt che mët la Provinzia tla condiziun da gestí les politiches dl trasport sön le porte dl Prener ciaran dla sostenibilité ambientala” á splighé Kompatscher. Cun le protocol se tol dant le Ministere y i sozi publics da colaboré por ciafé sö dötes les mosöres, da atué cun stromënc aministratifs y normatifs, por concretisé l'acordanza. Dlungia le paiamënt al Stat di 550 miliuns de euro metüs sön na pert dala sozieté tl “Fonds por la ferata”, prevëiga l’acordanza che i incremënc dles tarifes vais a öna cun i liví dl’inflaziun programada, che al vëgnes surantut la diretiva europeica Eurovignette fajon dantadöt referimënt a mosöres de compensaziun dl’incuinamënt ambiental gaujé dales infrastrotöres y al spostamënt dl trasport de marcianzies dala strada sön les scines.
L’acordanza por le renovamënt dla conzesciun prevëiga implü che la sozieté afidatara dl dagní se toles dant da paié 1395 miliuns, che ó dí 45 miliuns al ann, sciöche cuta de conzesciun. Implü él ince preodü intervënc infrastrotorai y laurs de manutenziun ordinaria y straordinaria por indöt 3 miliarg de euro.
rc
