Dala Junta: sostëgn ai patronac, norma por n sindacat etnich
Ince les organisaziuns sindacales é stades tl zënter dla sentada da incö (ai 12 de jená) dla Junta provinziala. Da öna na pert por la dezijiun da sostigní l’ativité di patronac tres n contribut de 300mile euro, dal’atra pert porvia dla proposta da lauré fora danü la norma d’atuaziun che mët le sindacat „etnich“ dl ASGB ala per cun les organisaziuns dl’uniun.
Da agn fej i patronac bele n sorvisc dër important por la coletivité pitan na seria de prestaziuns soziales por cunt dla Provinzia. „Al se trata de n sorvisc fondamental – á sotligné le presidënt Arno Kompatscher – por chël che al ne ê nia preodü da pert dla man publica finanziamënc implü.“ Les novités gnüdes a se le dé a livel statal, cun n gran smendrimënt di contribuc propi por les ativités di patronac, á porté la Junta provinziala a conscidré danü la situaziun. „Canche i sun gnüs a conescënza de chësta diminuziun di cosć unse tut la dezijiun da intergní cun n sostëgn finanziar implü de 300mile euro. Les ressurses nezesciares gnará metüdes a desposiziun tres la Regiun tl contest di fonds de competënza dla Provinzia de Balsan“, á splighé Kompatscher. Chësta forma de cofinanziamënt dl’ativité di patronac vëgn bele ince adorada tla Provinzia de Trënt.
L’esecutif de Palaz Widmann á ince fat pié ia la discusciun por ci che reverda l’ecuiparaziun dl sindacat „etnich“ dl ASGB ales atres organisaziuns che laora tl Südtirol. „Chësc reconoscimënt á süa fondamënta te na norma d’atuaziun dl Statut d’Autonomia – á prezisé le presidënt Kompatscher – che á sciöche obietif chël da garantí la rapresentanza a düc i grups linguistics, mo ti ultims agn él gnü a se le dé na debatüda sön les metodologies adorades por valuté la forma etnica de n’organisaziun, ince por ci che reverda na maiú atenziun ala privacy en relaziun ala detlaraziun de portignënza al grup linguistich. I un insciö tut la dezijiun da intergní cun na formulaziun nöia dla norma d’atuaziun por stlarí la chestiun: n pröm sböz é bele gnü lauré fora dai ofizi provinziai che ti gnará sëgn presenté ai sindacac por mené spo inant na proposta de mudaziun ala Comisciun di 6.“
rc
