Dala Junta: 32 miliuns de euro implü por la sanité
La Junta provinziala á assiguré i mesi finanziars nezesciars por le funzionamënt dla sanité südtiroleja, che se damana 32 miliuns de euro implü adöm cun les ressurses finanziares bele preodüdes tres le bilanz 2016: incö, ai 12 de jená, á la Junta provinziala aprové insciö le dessëgn de lege cun la variaziun al bilanz de previjiun por garantí chësc aumënt.
Cun le dessëgn de lege nü él poscibl da formalisé i spostamënc nezesciars danter i capitui de spëisa dl bilanz provinzial 2016 por recuperé i 32 miliuns de euro a bëgn dla sanité. Do la sentada dla Junta provinziala á le presidënt Kompatscher splighé incö (12/01) che les ressurses finanziares nöies gnará adorades da öna na pert (25 miliuns) por l’assunziun de personal sanitar ajuntif do la regolamentaziun nöia dl’UE di orars de laur di doturs y por garantí ince i standarg de personal scric dant tles repartiziuns por le sté de pert (por nasciüdes). D’atri set miliuns é preodüs por ajorné le sistem informatich dla sanité provinziala.
Deache al vëgn atoché de plü capitui dl bilanz de previjiun por podëi mëte a desposiziun chësta soma él preodü dal regolamënt nü che le ddl nü ti vëgnes sëgn mené inant al Consëi provinzial por süa aprovaziun.
rc
