Alpeuregio Summer School a Bruxelles dai 04 ai 14 de messé
Ince chësc ann organisëia l’Euregio Tirol-Südtirol-Trentin n curs de formaziun Alpeuregio Summer School a Bruxelles por 30 studënc: l’obietif é chël da promöie la conescënza dles istituziuns y dles politiches dl’Uniun Europeica. Le percurs formatif, dai 04 ai 14 de messé, sará por inglesc y tratará les tematiches dl funzionamënt dles istituziuns europeiches.
L’Alpeuregio Summer School é n’oportunité ideala por trënta studënc che vëgn dal Tirol, Südtirol y Trentin por podëi aprofondí sües conescënzes sön l’Uniun Europeica, por ciafé respostes a domandes che reverda le funzionamënt y i obietifs dl’UE y implü n’ocajiun unica por s'informé sön les poscibilités de laur al’intern dl aparat europeich. Al tolará ince pert al curs de formaziun de plü funzionars de alt livel y che laora te plü ofizi dl’UE y che jará ite sön les chestiuns y problematiches plü interessantes y atuales che reverda les politiches europeiches. L’ediziun 2016 é strotorada sön la basa de diesc priorités dl’UE cun n referimënt particolar ales arees che reverda le mudamënt dl tlima, l’ambiënt, l’energia y l’economia, le marcé digital, l’Europa sciöche autur mondial, la migraziun, les politiches regionales (EUSALP, GECT), le funzionamënt di prozesc de dezijiun tles istituziuns europeiches, les ativités de lobbying, la politica economica, soziala, la sanité y i consumadus, l’archirida y l’inovaziun.
Leziuns interatives, laboratori d’aprofondimënt y discusciuns ti dará ai ascutadus la poscibilité da aprofondí tematiches d’atualité y da odëi l’Uniun europeica da na prospetiva nöia. L’Alpeuregio Summer School 2016 gnará tignida dai 04 ai 14 de messé tla sënta dl’Euregio Tirol-Südtirol-Trentin a Bruxelles.
Por de plü informaziuns:www.alpeuregio.org/index.php/it
rc
