A22, travert storich: firmada l’acordanza de renovamënt dla conzesciun
„Al é n travert storich por nosta autonomia“: cun chëstes parores á i presidënc Arno Kompatscher y Ugo Rossi comenté la firma söl protocol d’intenüda dla prorogaziun dla conzesciun A22 ala sozieté in-house Autobrennero Spa. L’acordanza é gnüda firmada incö (ai 14 de jená) a Roma dal Minister Graziano Delrio y dai rapresentanc dles sozietés publiches dl A22.
„I sun stá bugn da porté a piz n percurs lunch y plëgn de impedimënc – sotlignëia Kompatscher y Rossi – al se trata de n travert storich, cun chël che al sará poscibl da renforzé ciamó deplü nosta autonomia, deache por merit de chësta intenüda sará le Trentin y le Südtirol i auturs prinzipai dles politiches dl trasport y dla mobilité söl teritore dla Regiun. I vantaji dla prorogaziun por i proscims trënt agn dla conzesciun dl’A22 sará concrec y da odëi por i zitadins cun conseguënzes positives nia ma por l’economia locala mo ince por la sconanza dl ambiënt.“
„La firma da incö – á comenté le Minister Graziano Delrio – é le scomenciamënt de n percurs inovatif dles conzesciuns de autostrades y é na pröma sperimentaziun te Europa de na sozieté de gestiun daldöt publica. Les condiziuns stabilides por la conzesciun prevëiga le control dles tarifes, la segurëza de investimënc, l’armonisaziun dles operes y l’impëgn por la sostenibilité: l’acordanza é le pröm vare de n percurs tler por le dagní cun investimënc definis. A chësta manira él ince poscibl da sbloché i finanziamënc dles trates feroviares dl Prener en acordanza cun les indicaziuns dl Minister. I sun contënt de chësta acordanza y i ti feji i complimënc ai ënc locai che ará l'inciaria y la responsabilité dla gestiun cun al zënter la cualité. Al ne é degöna scincunda, sciöche valgügn á dit adinfal, mo rodunt le contrat, al é la sconanza dl interes publich.“
L’acordanza, che é gnüda firmada incö a Roma dal minister Delrio, dai presidënc Kompatscher y Rossi en rapresentanza dla Regiun (mëmber de maioranza) y dles Provinzies autonomes, y da düc i atri mëmbri publics de Autobrennero Spa, prevëiga che l’aziënda che manajëia atualmënter l’A22 devëntes n’aziënda in-house daldöt publica. Cun le protocol él le Minister y düc i atri mëmbri publics che se tol dant te manira formala da lauré adöm por atué dötes les mosöres aministratives y normatives dl’acordanza.
Implü prevëiga l'acordanza ince la prorogaziun dla conzesciun cina al 2045, cun na soma de presciapüch 1,4 miliarg de euro partis sö söi proscims 30 agn y che prevëiga n paiamënt de 45 miliuns de euro vigni 12 mëisc. Implü vëgnel sëgn metü a desposiziun i 550 miliuns de euro (bele metüs da na pert) dal fonds feroviar che gnará adorá por le finanziamënt trasversal dles operes coliades sides dl BBT co ince dles trates d’azes. Tres le protocol d’intenüda firmé incö gnarál ince fat investimënc por zirca 3,5 miliarg de euro por ci che reverda le ressanamënt dles infrastrotöres y la manutenziun ordinara y straordinara dl’autostrada.
N ater punt important é la politica dles tarifes che prevëiga le coliamënt de adatamënt dles tarifes cun i liví d’inflaziun stimada y l’atuaziun dla diretiva europeica dl’eurovignette, cun chëra che al sará poscibl da atué tarifes desfarëntes aladô dl incuinamënt di veicui cun le fin da smendrí l’incuinamënt dl’aria y da aumenté la segurëza stradala. „Tres chësta acordanza – spliga inant Kompatscher y Rossi - ne sarál nia ma meso da mioré la situaziun dl trafich söl’autostrada, mo ince da mioré les condiziuns dl’aria, da smendrí l’incuinamënt acustich y en general da alzé la cualité dla vita de düc chi che vir dlungia l’autostrada dl Prener.“
Le protocol d’intenüda gnará presenté tl detai te na conferënza stampa
indoman, vëndres ai 15 de jená,
dales 12.00
tla sënta ofiziala dla Regiun
plaza Dante
a Trënt
a chëra che al tolará pert i presidënc Rossi y Kompatscher, adöm cun le presidënt y l’aministradú deleghé de Autobrennero Spa, Paolo Duiella y Walter Pardatscher.
rc
Galaria dales fotografies
Foto USP/Tasser
