Practicums da d’isté pro la Provinzia: domandes cina ai 31 de jená
Al sará indöt 200 studënc dles scores altes y dles Universités che ará la poscibilité da fá n practicum tl’Aministraziun provinziala. Le termo por dé jö les domaneds toma ai 31 de jená dl 2016.
I practicums da d’isté é por tröc studënc le pröm contat cun le monn dl laur y porchël él la Provinzia de Balsan che mët a desposiziun ince por le 2016 indöt 200 posć por i scolars y studënc dla cuarta y cuinta tlassa dles scores altes y profescionales, dles universités y por i studënc che á stlüt jö da püch so percurs academich. Düc i interessá po presenté süa domanda cina ai 31 de jená pro l'Ofize Assunziuns Personal dla Repartiziun Personal dla Provinzia.
Le practicum da d’isté vëgn paié cun na soma che vá dai 30 ai 50 euro brutto al dé. I critérs de assegnaziun é desponibls sön la plata internet dla Repartiziun Personal dla Provinzia (www.provincia.bz.it/personale). „Podëi ti dé n’odlada dal intern al’aministraziun publica y ales prozedöres aministratives é por i jogn dessigü interessant y pó ester n valur ajuntif ince por ci che reverda le curriculum“, sotlignëia l’assessuria provinziala por le personal Waltraud Deeg.
Por informaziuns plü monüdes prëibel contaté l’Ofize Assunziuns personal tla strada via Renon 13 a Balsan (0471 412118, Irene Egger, o 0471 412116, Tanja Nicolussi Rossi). Informaziuns él ince da ciafé sön internet tres la misciun www.provincia.bz.it/personale/temi/assunzione-tirocinanti-amministrazione-provinciale.asp. La gradatöra gnará spo publicada de merz chiló: www.provincia.bz.it/personale/temi/graduatorie.asp.
rc
