Dala Junta: Ok ala trassa d’azes, mo cun condiziuns por sconé l’ambiënt
Öna dles tematiches prinzipales dla sentada da incö (ai 19 de jená) dla Junta provinziala é stada le tunel de basa dl Prener y te na manira particolara la trassa d’azes a süd dl Prener. Le proiet definitif por le lot Franzensfeste – Pruca é gnü aprové dala Junta provinziala, mo al messará gní fat n valgönes mudaziuns sön la basa dles osservaziuns presentades dal Comité por l’ambiënt.
Do ester gnü presenté tl otober 2015 é le proiet che reverda la trassa d’azes al BBT danter Franzensfeste y Pruca gnü valuté dal Comité por l’ambiënt ai 30 de dezëmber dl ann passé che á aconsié da fá na seria de mudaziuns por tigní cunt de n valgönes problematiches. „La cualité y la sostenbilité ambientala de n proiet tan important sciöche chël dla trassa d’azes al BBT – á sotligné l’assessur Richard Theiner – é döes cosses che se stá dër a cör. Por chësta rajun á la Junta provinziala tut la dezijiun incö da aprové les osservaziuns dl Comité por l’ambiënt.“ Le lot Franzensfeste – Pruca reverda en general la realisaziun de döes galaries nöies y l’adatamënt dla trassa. Le tunel Scaleres, 15 chilometri lunch, coliará la staziun de Franzensfeste cun Funes, la secunda galaria ará indere na lunghëza de 6 chilometri cun scomenciamënt a Funes cina a Pruca. Döta la trassa sará sot tera ite, cun trëi ezeziuns por ci che reverda la staziun de Pruca, le punt y l’architada de Funes.
Le Comité por l’ambiënt á dé jö te süa valutaziun n arat positif al proiet, conscidran cun sodesfaziun che plü vari é bele gnüs fac por ci che reverda la fasa de elaboraziun, mo sotlignëia ince che n valgügn punc critics mëss gní revijioná. I punc plü importanc reverda l’incuinamënt acustich, l’impat al paesaje, la gestiun idrogeologica y la proietaziun dl punt sura la val de Funes. Le Comité por l’ambiënt á ince ghiré che al vëgnes otimisé les barieres cuntra la vera preodüdes tles zones d’azes dles galaries, sides a süd co ince a nord, y tl’area dla staziun de Pruca, y valuté la nezescité dla „finestra“ de Albes tl tunel Scaleres. „Sön chisc ultims punc él bele gnü fat de gragn vari inant. Prësc döta la trassa é sot tera ite cun ma n valgönes ezeziuns, la cossa plü importanta é ince la garanzia che al dess se mioré la proteziun cuntra l’incuinamënt acustich, ince sce tl dagní sará le numer de ferates en zircolaziun dessigü maiú“, insciö Kompatscher.
„La delibraziun aproada dala Junta provinziala – á ajunté Theiner – prevëiga implü che al vëgnes metü a desposiziun na soma dl 2 porcënt dl cost complessif dl proiet por finanzié de plü intervënc de compensaziun y de smendrimënt dles conseguënzes negatives por l’ambiënt.“ L’assessur Theiner á sotligné ala fin che „te döta chësta prozedöra él gnü a se le dé na colaboraziun costanta cun i ombolc di Comuns interessá che á porté dant sües propostes che é spo gnüdes valutades.“
rc
