Dala Junta: frabicac de competënza provinziala, plann 2016 por la gestiun
La Junta provinziala á aprové incö ai 19 de jená le program 2016 che reverda i intervënc de manutenziun ordinara y straordinara di bëgns imobiliars de competënza provinziala, cun investimënc por na spëisa complessiva de zirca 12,7 miliuns de euro.
„La Provinzia á elaboré n program de manutenziun de plü agn por i ofizi y les scores sciöche ince por i bëgns de patrimone en general por garantí la continuité di sorvisc desvalis a bëgn di zitadins“, spliga l’assessur por i laurs publics Christian Tommasini. Incö, ai 19 de jená, á la Junta provinziala aprové le program de intervënc de manutenziun por le 2016, che prevëiga na spëisa de indöt 12,7 miliuns de euro. I intervënc de manutenziun (ordinara, straordinara, reparaziuns) é preodüs por i frabicac de proprieté provinziala y locala: al se trata tl spezifich de frabicac che vëgn anuzá dal’aministraziun provinziala y de frabicac che vëgn adorá sciöche sëntes por laboratori, cantiers y scores altes y profescionales. Implü aldel ince lapró frabicac de aziëndes speziales (agricoltöra, bosć, sorvisc strades) y imobiliars de proprieté provinziala.
De plü é insciö i intervënc che reverda les sëntes scolastiches (danter l’ater a Balsan, Maran, Porsenú y Schlanders), intervënc de manutenziun dles üties da munt y intervënc de ressanamënt di cantiers stradai provinziai danter l’ater ince a San Martin de Tor. I laurs preodüs aladô dl program de manutenziun gnará realisá sön la basa dles esigënzes che vëgn a se le dé tratan l’ann cun intervënc de prescia che podará gní inseris ince tratan l’ann. Le numer de düc i intervënc tl 2015 é sté de 3.730.
rc
