Dala Junta: Löm vërda al iter por trasformé i raiuns Natöra 2000
Por cherié na rëi europeica ecologica ince tl Südtirol él gnü identifiché i raiuns de Natöra 2000. Sëgn dessel gní trasformé, aladô dles normes europeiches, chisc „Raiuns de importanza comunitara“ te „Raiuns de conservaziun speziai “. Incö, ai 19 de jená, á la Junta provinziala scomencé la prozedöra nezesciara che reverda 35 raiuns.
En acordanza cun la diretiva europeica „Habitat“ dl má 1992 sön la flora y la fauna é i Stac comëmbri obliá da identifiché i raiuns de sconanza Natöra 2000 (raiuns de importanza comunitara SIC). Implü prevëiga la diretiva che chisc raiuns dess gní trasformá te 6 agn te „Raiuns de conservaziun speziai“ (ZSC). Ma do la realisaziun de chësc vare é l’iter Natöra 2000 rové a piz. Por na gran pert di SIC tla Talia é chësc termin bele tomé y de conseguënza á la Comisciun europeica scomencé na prozedöra de violaziun ti confrunc dla Talia. „Por chësta gaujia á le Stat invié les Regiuns y les Provinzies autonomes da scomencé atira cun la trasformaziun di raiuns de importanza comunitara te Raiuns de conservaziun speziai“, á splighé l’assessur provinzial por l’ambiënt Richard Theiner.
La Junta provinziala á insciö scomencé la prozedöra por trasformé i 35 raiuns de importanza comunitara te Raiuns de conservaziun speziai. Implü á la Junta stabilí che chësta prozedöra dess gní fata aladô dl iter de aprovaziun di plans provinziai de setur. „A na te manira podarál gní garantí la partezipaziun de düc i interessá, n fatur che é fondamental por la Provinzia“, á splighé Theiner. La deliberaziun y la documentaziun é publicades online por 30 dis sön la plata dla Rëi Zivica y sará a desposiziun ince pro la Repartiziun provinziala Natöra, paesaje y svilup dl teritore, sciöche ince di Comuns interessá. Tratan chisc trënta dis sarál ince poscibl por i Comuns da fá propostes ala Junta provinziala. Daldô ará i Comuns dui mëisc de tëmp por presenté na valutaziun dles mosöres de valorisaziun y conservaziun di raiuns interessá. A contlujiun de chësc percurs y do avëi aldí la Comisciun provinziala natöra, paesaje y svilup dl teritore sarál indô la Junta che podará dí la süa sön l’aprovaziun dles mosöres de valorisaziun y conservaziun di raiuns da sconé.
rc
