Comité etich, aprové le program 2016
La Junta provinziala á aprové le program d’ativité dl 2016 dl Comité etich. Tl ann che á impormó metü man gnarál aprofondí la discusciun y al gnará porté dant idees y propostes sön chisc argomënc: le testamënt biologich, le scomenciamënt y la fin dla vita, la dejabilité, la donaziun de organs y la spartiziun dles ressurses.
Le Comité etich é n organ consultif dla Junta y dl'aministraziun provinziala tles materies che reverda l'etica tla medejina. Metü adöm da n presidënt (Herbert Heidegger), n vize-presidënt y 12 mëmbri da na formaziun desvalia (filosofs, teologs, operadus sanitars, iurisć) y da n orientamënt desvalí, á le comité presenté so program d’ativité por le 2016, che é gnü aprové dal esecutif dl Palais Widmann.
“Ince chësc ann – sotrissëia Heidegger – se cruziarunse de chestiuns sciöche le testamënt biologich, les cure d’alisiramënt liades ala fin dla vita, la donaziun de organs y la spartiziun dles ressurses tl setur sanitar tl Südtirol. Por nos él fondamental da ti pité la majera assistënza y le plü informaziuns che ara vá sön les chestiuns de carater etich ai zitadins, ai paziënc y a che che laora tl setur sanitar”. Avisa porchël dessel gní fora dl 2016 na brosciüra d’informaziun sön le testamënt biologich y les situaziuns d’emergënza sides por le personal spezialisé che por la jënt.
Dlungia l’ativité de sensibilisaziun tres relaziuns, arac, publicaziuns y tutes de posiziun, ó le Comité etich organisé dl 2016 n convëgn sön la fin dla vita y sön tröpes chestiuns davertes liades a d’ëra. “Ci pól pa me sozede sce i á stlüt jö le percurs de mia vita y i ne pó nia plü tó na dezijiun?”, stlüj jö l’assessuria Martha Stocker, che ajunta che “chëstes é domandes dër personales mo che tres de plü porsones mëss se fá, ince porvia di gragn vari inant tl ciamp dla medejina. Avisa te chësc setur tan zite pó l’intervënt dl Comité etich daidé tó la miú dezijiun”.
OSP
