Pest avalianza dles oportunités: Termin cina ai 29 de forá
Cina ai 29 de forá dl 2016 sarál poscibl da presenté les teses de laurea, les teses de dotorat, de master y i laurs d’inrescida che reverda la condiziuns dles ëres tla sozieté o l’ avalianza dles oportunités danter ëra y ël por fá para al concurs organisé dala Comisciun provinziala por l’ avalianza dles oportunités.
Le pest á l'obietif da premié les studëntes y i studënc che se dá jö cun tematiches che reverda l’avalianza dles oportunités o che taca adöm cun n'analisa dles condiziuns generales dl’ëra tla sozieté atuala. I laurs d’inrescida ne é insciö nia ma importanc deache ai motivëia la jonëza da se dé jö cun chëstes tematiches, mo ai pó ince ester la basa por mudé concretamënter la sozieté tl vers de na maiú avalianza dles oportunités danter i sesc.
Al pó gní dé jö teses de diploms y de laurea, teses de dotorat, laurs d’inrescida y teses de master de almanco dui agn y ince sce ares é gnüdes scrites por inglesc (cun injunté na traduziun taliana o todëscia). Na comisciun valutëia spo danter l’ater l’analisa dla spezifizité feminina, la congruënza dla tematica cun chestiuns nöies y atuales, la valutaziun dl’auturia y la dërta adoranza dl lingaz por ći che reverda trami dui i sesc.
I laurs premiá sará a desposiziun dl publich tla biblioteca dla Comisciun por l’avalianza dles oportunités tres le Sorvisc Ëra tla strada de via Dante 11 a Balsan.
Dötes les porsones interessades é periades da mené ite sües inrescides che reverda la condiziuns dles ëres tla sozieté o l’ avalianza dles oportunités danter ëra y ël cina ai 29 de forá dl 2016 al Ofize Ëres de via Dante 11 a Balsan. Por informaziuns plü monüdes, na descriziun di critérs de valutaziun, la bandida de concurs y i formulars prëibel consulté la plata internet: http://www.provincia.bz.it/pariopportunita/contributi-agevolazioni.asp
rc
