Dala Junta: Screening ambiental dl aeroport, inciaria al’APPA
Le proiet dl ampliamënt dla plaza dai fligri da Balsan messará gní sotmetüda a n screening ambiental che gnará coordiné dal’Agenzia provinziala por l’ambiënt. La documentaziun é gnüda dada jö inier (ai 25/01) dala ABD, la sozieté che gestësc l’aeroport. „L’APPA – sotlignëia l’assessur Richard Theiner – garantësc na valutaziun ogetiva y independënta, y ince i zitadins podará dé jö süa minunga."
Le proiet dl ampliamënt dla plaza dai fligri da Balsan messará gní sotmetü a n screening ambiental che gnará coordiné dal’Agenzia provinziala por l’ambiënt (APPA). La documentaziun é gnüda dada jö inier (ai 25 de jená) dala ABD, la sozieté che gestësc l’aeroport. „L’APPA – sotlignëia l’assessur Richard Theiner – garantësc na valutaziun ogetiva y independënta, y ince i zitadins podará dé jö süa minunga.“
Le proiet de svilup dl aeroport de Balsan, aprové d’otober dala Junta provinziala, prevëiga n ampliamënt dla pista d’ateraje che podará passé da 1.294 a 1.462 metri de lunghëza. La gran pert di intervënc, chël ó dí chi che reverda l’ampliamënt cina a 1.432 metri, é bele gnüs aprová mo ne é nia ciamó gnüs stlüc jö, y ma cun ciamó 30 metri lapró sarál poscibl da jí inant cun la revijiun dl conzet de gestiun dla plaza di fligri dla plü gran cité südtiroleja.
La sozieté de gestiun dl aeroport (ABD – Airport Balsan Dolomiti) á implü ciafé l’inciaria da stlü jö le plann cun na relaziun ambientala detaiada sön les conseguënzes dla presënza dl aeroport, che contëgn ince n screening da pert dl’Agenzia provinziala por l’ambiënt. „L’analisa dles conseguënzes dl aeroport sön le paesaje y l’ambiënt é da tres öna de nostes priorités – insciö l’assessur Richard Theiner – y al é important che i stüdi vëgnes fac da istituziuns competëntes. A chësta manira ne podunse nia ma garantí che dötes les emisciuns pois gní monitorades mo ince smendrides.“
Le proiet de svilup, che contëgn ince na relaziun ambientala, ti é gnü dé jö inier (ai 25 de jená) dala ABD ai ofizi dl’Agenzia por l’ambiënt y l’iter prevëiga ince la publicaziun de döta la documentaziun sön le portal web dla Provinzia de Balsan sot ala misciun: www.provinz.bz.it/umweltagentur/uvp/veroeffentlichung-projekte.asp.
Dötes les porsones interessades ará 45 dis de tëmp por mené inant sües tutes de posiziun che messará gní dades jö al Ofize Valutaziun dl impat ambiental de via Amba Alagi 35 a Balsan (email via@provincia.bz.it). Do la tomada de chësc termo ará le Comité ambiental ciamó 45 dis de tëmp por elaboré na resposta y por valuté les posiziuns portades dant dai zitadins „y iö tignará spo cunt de chisc resultac ala fin”, stlüj jö Theiner.
rc
