Dala Jonta: apurveda la strategia de gestion dla Dolomites patrimone UNESCO
Scuné la ntegrità y cunservé la carateristiches straurdeneres dla Dolomites: a chësc mira la strategia cumplessiva de gestion dla Dolomites patrimone mundiel UNESCO. La strategia ie unida apurveda ncuei dala Jonta provinziela. Cater ie i ponc tlé cun la mesures curespundëntes.
Lauré ora na strategia de gestion n cumenanza ie una dla prescrizions dates dant dala UNESCO tl 2009, canche la à detlarà la Dolomites patrimone mundiel. “Cun chësc documënt strategich uelen garantì la cunservazion dl valor straurdener y universel dla Dolomites, patrimone UNESCO, y scuné si ntegrità” sotrissea l assessëur provinziel per l ambient Richad Theiner.
La strategia n cumenanza ie unida laureda ora dala Fundazion Dolomites UNESCO deberieda cun la Regions y Provinzies sun l teritore de chëles che l patrimone mundiel se spand ora. L documënt cuntën nce n’autra prescrizion dla UNESCO: la strategia per n turism sustenibl te dut l raion dl patrimone mundiel. Tla strategia iel unit tëut n cunscidrazion tuédes defrëntes sun l turism y la mubiltà, na nrescida sun la cëries che l raion possa supurté y i resultac dla discuscions “Dolomiti 2040” – 11 ancuntedes sun la Dolomites patrimone mundiel, che ie unides tenides d’instà dl 2015 cun i reprejentanc dla grupes de nteres. Tl Südtirol ie la strategia cumplessiva de gestion nce unida trateda cun la grupa de lëur permanënta per la Dolomites patrimone UNESCO.
Ai 21 de dezëmber 2015 à l Cunsëi d’aministrazion dla Fundazion Dolomites UNESCO apurvà la strategia de gestion complessiva y ncuei se à la Jonta provinziela dat ju cun la tematica. “Te chësta strategia iel nce tlarì la vijion a chëla che nosc lëur se urientea: n bën mundiel n cumenanza per chël che duc – populazion locala y ghesć – se sënt respunsabli y se cruzia che l vënie defendù y posse se svilupé a na maniera sustenibla”, à spligà Theiner. Chësc travert messerà unì arjont tres 4 ponc tlé, de chëi che uniun cuntën obietifs strategics y mesures cuncretes.
L pont tlé “patrimone“ fej referimënt ala defendura dla particulariteies dla cuntreda y dla geologia dl raion dolomitich y tol nce ite la pruibizion de realisé infrastrutures da jì cun i schi nueves tl raion dl patrimone mundiel, tlo leprò toca nce i raions danterite. L pont tlé “esperienza” uel alincontra valorisé la cunescënza di vijitadëures n cont de n turism sustenibl, chël uel dì n cont dla gestion reguleda di flusc de persones, dla limitazion dla infrastrutures turistiches y de na presentazion unitera dl bën naturel mundiel.
L pont tlé “cumenanza” mira dal’autra pert a sustenì la cuscienza dla populazion locala de viers dl bën mundiel UNESCO, a renfurzé l barat culturel y a valorisé i prodoc locai. Ala fin iel mo l pont tlé “sistem” che reverda l coordinamënt y la metuda tla rë dl’ativiteies y dla culaburazion che se porta pro dainora danter la istituzions, la urganisazions y i autri atëures tl raion dl patrimone mundiel.
“N valguna mesures dli 4 ponc tlé ie bele tla fasa de atuazion, d’autres ie tla fasa de proietazion y unirà cuncretisedes tl daunì”, tlarësc Enrico Brutti, l diretëur n cëria dl Ufize provinziel parcs naturei, cumpetënt per l patrimone mundiel UNESCO tl Südtirol:
Do l’apurvazion dla Jonta provinziela ti vën la strategia de gestion complessiva śën mandeda dala Fundazion Dolomiti UNESCO al Ministere per l ambient a Roma, che manderà pona inant la documentazion ala UNESCO a Paris.
USP
