No Credit: plü controi, colaboraziun cun le Tirol y le Trentin
Plü controi de velozité y na maiú colaboraziun cun le Trentin y le Tirol. Chisc é i obietifs dla campagna de sensibilisaziun sön la segurëza sön strada No Credit, piada ia tl 2006. Sön proposta dl assessur Florian Mussner á la Junta provinziala aprové le program por le 2016. „La segurëza é fondamentala sön strada – comentëia Mussner – y al vá debojëgn de na sensibilisaziun costanta.“
Bele rovada ala undejima ediziun é la campagna de sensibilisaziun No Credit na mosöra costanta de sensibilisaziun por n comportamënt adaté sön strada y á sciöche obietif chël da smendrí i inzidënc. „Öna dles cosses plü importantes sön strada é da rovëne te na manira sigüda y cun prudënza. Dantadöt vél chësc por i motoziclisć, ince deache ti caji de inzidënc é les conseguënzes scialdi plü series por les porsones interessades“, spliga l’assessur por la mobilité Florian Mussner. Incö, ai 26 de jená, él gnü aprové da jí inant cun la campagna de sensibilisaziun ince por le 2016, cun le focus dantadöt sön n aumënt di controi tratan la sajiun da d’isté cun n monitoraje costant dles velozités di motoziclisć.
„La velozité massa alta é la gaujia prinzipala di inzidënc cun i motors, porchël gnarál ince aumenté la colaboraziun cun la polizia y le Comissariat dl govern che funzionëia bele dër bun“, spliga inant Mussner. L’atra novité por chësc ann reverda ince la partezipaziun ales aziuns de sensibilisaziun i „vijins de ciasa“, la Provinzia de Trënt y le Land Tirol. „I ún bele albü n valgönes incuntades de preparaziun“, dij Florian Mussner, che recorda ince che „cun No Credit él nosta ghiranza da ti fá n apel al sëns de responsabilité dles singules porsones, che fej pert ince de atres mosöres sciöche n sistem de controi costant, sanziuns y operes stradales de proteziun.“ I detais dla campagna 2016 de No Credit gnará presentá tles proscimes edemes.
rc
