Ativités da d’isté y dl domisdé, criters de sostëgn nüs
Ai messass jí en forza cun le mëteman dl isté i criters de sostëgn nüs che reverda les ativités da d’isté y dl domisdé di mituns y di jogn. I contignüs dla reforma ti é gnüs presentá ales assoziaziuns, cooperatives y organisaziuns che laora tl setur dl’assessuria Waltraud Deeg y dal diretur dl’Agenzia por la familia Stefan Walder.
„Ti mëte a desposiziun ai zitadins n’oferta ampla y cun la medema cualité dles ativités extrascolastiches – á sotligné l’assessuria Waltraud Deeg – é un di pilastri por na buna convivënza danter i tëmps de laur y chi da ti dediché ala familia, y porchël é chësta tematica ince öna de nostes priorités. La proposta di criters nüs é le resultat de n percurs de condivijiun ince cun chi che laora tl setur a livel local.“ L’obietif prinzipal dla reforma é chël da smendrí les barieres burocratiches, da scemplifiché les prozedöres, da alisiré y sostigní la planificaziun. „Implü orunse ince mioré la colaboraziun cun i comuns, por ne avëi nia n’oferta capilara sön döt le teritore, mo ince tratan döta la perioda anuala“, á sotligné l’assessuria Deeg. Öna dles novités che é gnüda presentada dal diretur dl’Agenzia por la familia Stefan Walder é chëra da avëi l’azes ai contribuc ince por les ativités da d’isté cun la partezipaziun minima de 8 mituns y che döra almanco n’edema.
Al é ince preodü da alzé l’eté di partezipanc, da 14 ai 15 agn. „Na dezijiun d’oblianza, ince deache i studënc che fej i practicums da d’isté mëss almanco avëi 16 agn“, á splighé Deeg. I mituns cun handicap podará indere se scrí ite ales ativités cina che ai ará complí 18 agn. I operadus che laora tl setur á ince dé süa valutaziun positiva por ci che reverda la poscibilité da damané contribuc por les ofertes tratan les periodes de vacanza de novëmber y tratan Carlascé. Denant co jí en forza messará le sistem de sostëgn nü ciamó gní aprové dala Junta, che messass gní a se le dé ciamó dan l’isté. „Tratan l’ann passé á l’Agenzia por la familia ciafé indöt 250 domandes do n contribut por le sostëgn dles ativités estives y por merit dl sostëgn finanziar ai proiec él sté meso da pité n’assistënza a indöt 57mile mituns. Dötadöm gnarál metü a desposiziun por le 2016 la soma de 4,7 miliuns de euro, indere por ci che reverda les ativités dl domisdé sará les ressurses por l’ann scolastich atual 2015-16 de indöt 1,9 miliuns de euro“, stlüj jö Walder.
rc
