Scora ladina: 42 educadësses á stlüt jö la scoraziun Montessori
Indöt á 42 educadësses y educadus, en gran pert dla scora ladina, stlüt jö en sabeda, ai 30 de jená, la scoraziun „Montessori“ metüda a jí dal Ciamp Inovaziun y Consulënza adöm cun la Akademie Montessori Biberkor de Paiern. „La scora ladina pó amplié insciö süa oferta formativa cun na forma de pedagogia de valüta internazionala“, á sotligné l’assessur Mussner pro la surandada di diploms.
Ti pité ai mituns y ales mitans na formaziun mirada y focalisada sön le singul, avëi na buna conescënza pratica dla pedagogia Montessori y integré formes d’insegnamënt nöies tles scores ladines: chisc é stá i fins prinzipai dla scoraziun „Montessori“ che é gnüda organisada dal Ciamp Inovaziun y Consulënza dl’Intendënza ladina adöm cun l’Akademie Montessori Biberkor dl Paiern tla perioda 2014-16. L’Academia todëscia é n'istituziun da na gran espriënza tla pedagogia Montessori y vëgn conscidré n partner dër afidabl por insegné la converjiun dala teoria ala pratica dles metodes d’insegnamënt Montessori.
Ales partezipantes y ai partezipanc che á stlüt jö la scoraziun ti él gnü surandé en sabeda, ai 30 de jená dl 2016, i diploms de contlujiun dla scoraziun „Montessori“ tl contest de na picia festa de premiaziun tla scora elementara a Urtijëi. „Cun l’anuzamënt dla metodologia Montessori te nostes scores sarál poscibl da mëte tres deplü i mituns y les mitans tl zënter dl’educaziun. Sües ghiranzes y sü dejiders gnará svilupá y acompagná tresfora cun le sostëgn profescional di educadus“, sotlignëia l’assessur por la scora ladina Florian Mussner. L’ajornamënt cun metodologies nöies á ince na gran valüta por döt le sistem scolastich ladin che se desmostrá insciö flessibl y bun da s’adaté a sfidades atuales, insciö Mussner. Ince por l’intendënt Roland Verra é l’integraziun dla pedagogia Montessori „n’inovaziun didatica importanta ince por i laurs ti proscims agn y cun la formula dla scoraziun él ince sté meso da arjigné les educadësses y maestres te na manira otimala da trasformé la teoria te formes pratiches d’insegnamënt.“ Por le diretur de Inovaziun y Consulënza Felix Ploner é la scoraziun stada "n gran investimënt nia ma organisatif, mo ince finanziar, che á sogü paié la möia por sostigní le svilup de nüsc mituns y nostes mitans".
Döes sará les formes de integraziun dla pedagogia „Montessori“ tl insegnamënt da vigni de dles scores ladines: da öna na pert él gnü metü da jí ofizialmënter les prömes tlasses „Montessori“ tla scora elementara de Urtijëi y dal’atra pert sarál poscibl por les educadësses da adoré les formes de pedagogia imparades tratan la scoraziun al intern dl insegnamënt „tradizional“ tles tlasses.
Les 42 educadësses y educadus che á tut pert al curs á frecuenté tratan la perioda de dui agn (2014-2016) indöt 10 modui che é gnüs organisá tratan i fins dl'edema. La gran pert dles partezipantes vëgn dala scores elementares de Gherdëna y dla Val Badia, mo al á ince tut pert döes maestres dles scolines, cater maestres dla scora todëscia y taliana y öna na colaboradëssa y un n colaboradú de Inovaziun y Consulënza. Les tematiches prinzipales dla scoraziun é stades i insegnamënc tla vita pratica y l’adoranza dl material Montessori tratan les ores de matematica, geometria y lingaz. Plü informaziuns sön la formaziun pitada da Inovaziun y Consulënza ciafëise sön le sit pedagogich.it
rc
Galaria dales fotografies
