Dala Junta: üties da munt, 20 sön 21 romagn ai gesturs atuai
Ares s’é stlütes jö da püch les prömes 21 gares por les üties da munt de proprieté dla Provinzia. Dötes les strotöres, adinfora dla Ütia Borletti, é gnüdes assegnades ai gesturs atuai. La bandida publica, che é gnüda despartida aladô dl numer dles üties, prevëiga na conzesciun trienala che podará gní arlunjada por ciamó trëi agn por garantí la planificaziun di investimënc.
„Les üties da munt é na pert fondamentala dla merscia turistica dl Südtirol y un di sëgns de marca plü importanc de nosc teritore – á sotligné le presidënt Arno Kompatscher – y al é insciö important che la gestiun vëgnes surandada a chi che garantësc standarg de cualité alc. Propi por chësta gaujia ti él gnü dé, tles bandides de concurs, n gran pëis ales carateristiches spezifiches de vigni strotöra y ai criters cualitatifs.“ Chësc percurs de surandada dla gestiun dles üties cun tl zënter la cualité, é ince gnü valuté positivamënter dal assessur por le patrimone Florian Mussner, che recorda che „danter i criters plü importanc él gnü inserí l’esperiënza tla gestiun de strotöres alpines, la conescënza dl teritore y ince l’esperiënza che reverda seturs dl alpinism, dl pröm aiüt y dla proteziun zivila“.
Ala fin dla prozedöra scomenciada d’otober dl ann passé á la comisciun tut la dezijiun da assegné 20 dles 21 üties ai gesturs atuai: danter les 20 üties da munt él ince da ciafé la ütia de Ncisles (Santa Crestina), la ütia de Dantersasc (St. Crestina) y la ütia „Rifugio Genova“ a Funes. Ma por trëi üties él sté de plü che á fat domanda; cinch üties de proprieté dla Provinzia (aldinfora dles 21) n’é nia ciamó gnüdes assegnades. Da segnalé él ince ciamó che ma por öna na ütia ne é la gestiun nia gnüda assegnada (Ütia Bergl/Borletti; raiun Ortles). „La comisciun á araté la documentaziun presentada nia completa y al gnará scrit fora na bandida nöia tles proscimes edemes“, á comenté Kompatscher.
La prozedöra prevëiga n contrat de basa dla dorada de trëi agn cun la proposta de arlungiamënt de d’atri trëi agn sön la valutaziun positiva dl Ofize Patrimone dla Provinzia. I contrac d’afit ti garantësc ala Provinzia n davagn anual de 218mile euro cun afic desfarënc da ütia a ütia sön la basa dl’azessibilité, dles dimenjiuns, dl numer de posć da dormí y di vijitadus.
rc
