Dala Junta: calënder di dessëgns de lege provinziai tl 2016
La Junta provinziala á definí incö (ai 2 de forá) le program legislatif da atué dl 2016 y le calënder che taca lapró por alisiré la programaziun di laurs. Al se trata de na seria de ddl che la Junta oress elaboré cina la fin dl ann y che reverda les leges organiches nöies y i adatamënc ales diretives europeiches y statales.
La Junta provinziala á concordé da püch cun l’Ofize legislatif n program temporal de presentaziun di dessëgns de lege cun i fins prinzipai da concordé insciö damí i laurs cun i Departimënc, da garantí prozedöres asveltes y da avëi na colaboraziun strënta cun le Consëi provinzial. La planificaziun temporala dess ester, insciö á splighé le presidënt Kompatscher, n aiüt por düc i ofizi che laorará para y dess conzede n laur plü organisé ince tles Comisciuns legislatives y tl Consëi provinzial. Na gran pert di dessëgns de lege podará, aladô dl calënder programé, gní mené inant al Consëi provinzial bele ti pröms sis mëisc dl ann por che ai pois jí en forza ciamó dl 2016.
Tla lista él da ciafé danter l’ater les leges nöies sön le svilup dl teritore y dl paesaje, sön l’internet asvelt, l’ordinamënt dl comerz, la reorganisaziun dles assoziaziuns turistiches y dl sorvisc sanitar provinzial. La Junta ó implü ince mudé na seria de leges atuales bele en forza y che reverda le patrimone, les espropriaziuns, l’assistënza scolatsica, le dërt al stüde universitar y l’educaziun permanënta. Al gnará implü ince reformé la lege provinziala söi museums y chëra sön la valutaziun dl impat ambiental. Implü él ince gnü confermé la reforma organica dla lege provinziala sön le frabiché abitatif alisiré.
Tla lista de leges che la Junta á l’obietif da aprové dl 2016 él ince da ciafé la lege sön l’armonisaziun dl bilanz, preodüda por ma y le ddl sön le bilanz de previjiun 2017, sön le calënder t’otober. Le pachet de scomenciadies legislatives dla Junta dl 2016 tol ite ince l’ajornamënt de n valgönes desposiziuns aministratives, sciöche por ejëmpl la lege sön l’aministraziun daverta y chëra sön la strotöra di suranstanc dla Provinzia.
rc
