Dala Junta: dac tres plü azessibli y saurí da adoré cun Open Data
I dac de proprieté dl’aministraziun pulica sará azessibli por düc y podará gní adorá tres le portal Open Data Südtirol. La deliberaziun che regolamentëia n’azessibilité tres plü daverta ai Open Data é gnüda aprovada incö (ai 2 de forá) dala Junta provinziala sön proposta dl’assessuria Waltraud Deeg.
„I sun sigüsc che chësta é la dërta strada – á sotligné l’assessuria Deeg – nia ma deache la publicaziun di Open Data contribuësc a n’aministraziun publica plü daverta, mo ince deache ara porta para n valur implü por la popolaziun y por le setur economich, deache ara garantësc n barat d’informaziuns plü asvelt y diret.“ Le conzet dl plann strategich „Südtirol digital 2020“ é propi chël da ti mëte a desposiziun ai zitadins, ales aziëndes y istituziuns i dac tres la creaziun de n portal davert cun les informaziuns dles aministraziuns publiches.
Le portal dediché ai Open Data (dati.retecivica.bz.it) contëgn atualmënter indöt 250 series de dac da plü aministraziuns, mo tl dagní sará le numer di dac a desposiziun tres maiú. Cun la deliberaziun aproada incö (ai 2 de forá) dala Junta provinziala vëgnel invié dötes les istituziuns publiches da mëte a desposiziun i dac sön le portal Open Data Südtirol te almanco un n format por düc y che podará gní anuzá liberamënter tres n sistem de lizënzes dal inom CCO (Creative Commons Zero).
„Cun l’azes diret a chisc dac sarál meso da alisiré la comunicaziun dles informaziuns, da favorí la partezipaziun democratica y da promöie ativités d’archirida y la creaziun de app nöies y de d’atri stromënc digitai“, á splighé l’assessuria Deeg. Implü sarál poscibl cun le portal da evité cosć por l’aministraziun, da ajorné tresfora la cualité di dac y da sparagné ressurses por merit de n azes scemplifiché. Un di proscims vari sará ince n’analisa por odëi sce al é poscibl da mëte sö na colaboraziun te chësc setur a livel euroregional por cherié n portal Open Data de döta l’Euregio.
rc
