Consulta di jogn: Löm vërda al program anual - Chestiun dla ciasa tl zënter
La Consulta di Jogn ladina s’á incunté en vëndres (05/02) a La Ila por dé jö so arat sön le program anual por la promoziun dl sorvisc jogn dl grup linguistich ladin. Do na debatüda é le plann gnü aprové. La Consulta á ince stabilí, da orëi se dé jö tl dagní de plü cun la chestiun di jogn y dla pröma ciasa por informé i jogn sön les poscibilités de cumpra y costruziun de na pröma ciasa.
Cun a cé le presidënt Gottfried Nagler s’á la Consulta di Jogn por le grup linguistich ladin dé jö da püch te n'incuntada dan da püch tl Zënter pro la jonëza nü a La Ila cun le plann anual por la promoziun dl sorvisc jogn dl grup linguistich ladin tles valades ladines. Por l'ocajiun á le diretur de repartiziun dl'Intendënza Alexander Prinoth porté dant le plann che regolamentëia danter l'ater l’ampliamënt y le sostëgn finanziar dles infrastrotöres di jogn, la promoziun dles ativités, di proiec y di programs straordinars a bëgn dla jonëza. Implü se dá le plann ince jö cun le regolamënt sön les inrescides scientifiches, la conzesciun di contribuc promozionai y le program dles ativités dl sorvisc jogn dl’Intendënza ladina. Do la löm vërda da pert dla Consulta di Jogn gnará sëgn le plann anual mené inant a Balsan por gní traté y aprové te Junta provinziala. Te süa sentada á la Consulta di Jogn ince debatü sön le documënt strategich svilupé adöm ales atres döes Consultes y che ti é gnü presenté da püch dai suranstanc dles trëi Consultes ince ai trëi assessurs competënc Florian Mussner, Christian Tommasini y Philipp Achammer.
Sön öna na chestiun laurará la Consulta di jogn te na manira mirada tratan le 2016 y che reverda i jogn y la pröma ciasa. Dui sará i aspec che gnará analisá a funz: da öna na pert la documentaziun dla situaziun tl setur dl frabiché por i jogn tles valades ladines por ti presenté spo la tematica ai assessurs competënc (dantadöt ince ala löm dla reorganisaziun dl setur dl frabiché alisiré sön le program dla Junta por le 2016) y dal'atra pert manifestaziuns de informaziun tles valades ladines por sensibilisé i jogn sön i programs de sostëgn (por ejëmpl tres le proiet "Sparagn Ciasa") pro la cumpra y la costruziun de na pröma ciasa.
rc
