De internazional dl lingaz dla uma: Convëgn ai 19 de forá
En gaujun dl De internazional dl lingaz dla uma ogranisëia le Sorvisc de coordinamënt por l’integraziun en vëndres, ai 19 de forá dl 2016, dales 17.00 inant n convëgn en presënza dl soziologh Adel Jabbar y cun le scienziá Lorenzo Zanasi dl Eurac tl Palaz Widmann a Balsan. L’entrada é debann, iscriziuns tres email.
Le De internazional dl lingaz dla uma vëgn festejé vigni ann ai 21 de forá y é gnü istituí dal UNESCO dl 1999 sön proposta dl Bangladesh por recordé la protesta gnüda a se le dé dl 1952 tl Pakistan oriental (da denant) por defëne le bengalej, lingaz dla uma di abitanc de chël raiun, cuntra l’impostaziun da adoré le urdu. Cun chësta scomenciadia n‘ó l’UNESCO nia ma recordé dötes les porsones che é mortes te chë situaziun, mo ince mostré che le plurlinguism pó ester n bëgn prezius por garantí n’istruziun de cualité por düc, por promöie l’integraziun y combate la descriminaziun.
Le Sorvisc de coordinamënt por l’integraziun dla Provinzia organisëia por l’ocajiun n convëgn dal titul „De internazional dl Lingaz dla uma“, che gnará tigní
en vëndres, ai 19 de forá dl 2016
dales 17.00 inant
tl salf dla curt interna
de Palaz Widmann
plaza Silvius Magnago 1
a Balsan.
Sön le program dl evënt, a chël che al tolará ince pert la direturia dl Departimënt por l’integraziun Nicolussi-Leck, él na debatüda cun le soziologh Adel Jabbar y cun le senior researcher dl’Eurac Lorenzo Zanasi che stüdia de plü aspec dles mendranzes linguistiches.
Zanasi tignará la relaziun dal titul „Le lingaz dla uma y les usc di atri: na strada che vá te döes direziuns" y analisará la tematica dl lingaz dla uma dal punt d’odüda scientifich, jon ite ince sön l’evoluziun di stüdi de linguistica y sön les tecniches de stüde plü atuales.
Le soziologh Jabbar á chirí fora sciöche argomënt i „Contesć de migraziun y le pluralism linguistich“ cun chël che al ó mostré sö i vantaji y les problematiches dl mantignimënt dl lingaz dla uma en relaziun al’adoranza tres plü alta dles tecnologies nöie sciöche internet y i social media.
Düc i interessá é inviá a tó pert. La partecipaziun é debann. Al vëgn damané da se scrí ite cun na email ala misciun: coordinamento-integrazione@provincia.bz.it
rc
