Roland Verra espert dl mëis sön Mercator, rëi d'archirida europeica
La promoziun di lingac de mendranza te contesć de plurilinguism é un di obietifs primars dla rëi d’archirida “Mercator”, la organisaziun dles scores de mendranza por cunt dl’Uniun Europeica. La plataforma europeica presentëia da püch sön süa plata internet l’intendënt Roland Verra sciöche espert dl mëis de forá y fej ince referimënt a süa publicaziun “The Ladin language in education in Italy".
N post prominënt ti speta tratan döt le mëis de forá dl 2016 al Intendënt por la scora ladina Roland Verra che vëgn presenté sciöche “Expert in the spotlight” sön la plata internet ofiziala dla rëi d’archirida europeica “Mercator”, la organisaziun dles scores de mendranzes por cunt dl’Union Europeica. La presentaziun fej ince referimënt ala publicaziun sön le Ladin te scora (The Ladin language in education in Italy) scrita por inglesc, che é atualmënter en stampa y che sará da avëi tosc tres Mercator Education. „Öna dles majeres sfidades te mi setur de stüdi é la sconanza dla posiziun atuala dl Ladin te n sistem scolastich plurilingual, olache le todësch y le talian (y ince l’inglesc) á na majera conscidraziun“, dij l’intendënt Roland Verra tl’intervista publicada sön Mercator. Por lí do döta la intervista prëibel ciaré sot a: http://www.mercator-research.eu/minority-languages/expert-in-the-spotlight/roland-verra/
Ciafé i mecanism adatá por insigné te na manira otimala i lingac de mendranzes te n contest plurilinguistich é un di obietifs prinzipai dles inrescides realisades da Mercator. La plataforma Mercator é na rëi europeica cun de plü zëntri de promoziun di lingac de mendranzes y lingac regionai. L’ativité d’archirida de Mercator á so focus sön le stüde dles realtés plurilinguistiches cun n’atenziun particolara al svilup di lingac de mendranza por ci che reverda la didatica, l’insegnamënt, la legislaziun y i media. Ara cöi ince adöm informaziuns por realisé banches dac de consultaziun y confrontaziun a livel europeich.
Le proiet Mercator vëgn finanzié dal’Uniun Europeica cun indöt cinch partner che fej pert dla rëi academica: le zënter europeich Mercator por le plurilinguism y l’aprendimënt de lingac foresć/Academia Fryske da Ljouwert (Olanda), Zënter por sociolinguistica y comunicaziun (CUSC) dl'Université da Barcelona, Mercator y media/Université Aberystwyth dl Galles, le zënter d’archirida linguistica dl Academia dles sciënzes ungereja da Budapest y le Zënter por i Stüdi dl finlandej dla Université Mälardalen de Eskilstuna/Västerås tla Svezia.
rc
