Dala Junta: internet asvelt, ok al program anual
La Junta provinziala á aprové incö (16/12) le program 2016 da 9,5 miliuns de euro por l’ampliamënt dl’infrastrotöra che porta fora por la Provinzia l’internet asvelt. Trëi é i seturs d’intervënt: la contlujiun dles mosöres por le coliamënt de 155 zentrales Telecom ala rëi telematica, na defujiun ampla dla fira otica sön le teritore y le completamënt dl’„ultima milia“ por 150 strotöres publiches.
Le program 2016 é le resultat dla colaboraziun danter la Repartiziun provinziala dl’Informatica, le Ofize Infrastrotöres por telecomunicaziuns, la RAS, la Informatica Südtirol (SIAG) y le Consorz di Comuns. „Le completamënt de na rëi dla vëta leria capilara ne ti consënt nia ma ales families y ales impreses da s’anuzé de coliamënc internet dër asvelc mo é ince öna de nostes priorités strategiches“, á sotligné l’assessuria Waltraud Deeg incö pro la conferënza stampa do la sentada dla Junta. L’assessuria á injunté che „al se trata de na infrastrotöra fondamentala nia ma por la digitalisaziun, mo ince por la competitivité de nosta Provinzia“.
Le program 2016 prevëiga danter l’ater le completamënt dl proiet de coliamënt ala rëi telematica provinziala dla fira otica de dötes les 155 zentrales Telecom tl Südtirol. Chësta operaziun ti conzed a düc i zitadins che vir o laora a 3 chilometri dales zentrales da podëi s’anuzé de coliamënc internet cun na velozité dër alta, danter i 7 y i 20 Mbit/s. „Dai 2 Mbit/s inant vëgnel baié de internet asvelt“, insciö l’assessuria Deeg.
Implü jarál inant i laurs por la realisaziun di coliamënc cun la fira otica por arjunje düc i punc de destribuziun di comuns, che vëgn definis „PoP“, y che mëss gní realisá dala RAS. „Dötaurela vëgnel lauré chiló ince tla Val Badia“, insciö l’assessuria Deeg.
N ater obietif dl program 2016 é da colié indöt 150 strotöres publiches en proprieté dla Provinzia y di Comuns cun la fira otica. I investimënc te chësc setur é por la Provinzia de Balsan de indöt 9,5 miliuns de euro, lapró röiel ciamó i 22 miliuns dal FESR (Fonds europeich por le svilup regional) por le proiet dl’ „ultima milia“ ti Comuns cun capazités mëndres y 15 miliuns dal FEASR (le fonds europeich por le svilup rural) por i coliamënc internet asvelc tles zones de produziun.
rc
Galaria dales fotografies
