Dala Junta: acordanza scores-ANPI por analisé la perioda storica 1919-1948
La Junta provinziala á aprové incö le protocol d’acordanza danter les trëi Intendënzes scolastiches y l’ANPI (l’Assoziaziun nazionala di partejans) por amplié la conescënza di avenimënc storics tratan la perioda danter le 1919 y le 1948 tles scores. Al é preodü de plü scomenciadies.
„Adöm cun le Comité provinzial dl’ANPI ó la Provinzia renforzé la conescënza storica, la cosciënza zivila y i valurs dla toleranza, convivënza y solidarieté danter i jogn y tles scores“, á splighé l’assessur provinzial Christian Tommasini incö pro la conferënza stampa do la sentada dla Junta. Le fin prinzipal dl protocol d’acordanza, che tól ite les trëi Intendënzes ladina, taliana y todëscia, é chël da sostigní la cosciënza storica dla liberaziun dal fascism y nazism tl Südtirol y en general la perioda storica danter l’ann 1919 cina l’ann 1948. Le protocol – presenté da Tommasini adöm cun i assessurs por la scora ladina Florian Mussner y por la scora todëscia Philipp Achammer - é gnü aprové incö dala Junta – y gnará ince firmé dai intendënc Roland Verra, Nicoletta Minnei y Peter Höllrigl y dal presidënt dl’ANPI provinziala Orfeo Donatini.
Les scores y l’ANPI laurará insciö te na manira mirada danter l’ater sön les tematiches che reverda la perioda danter le 1922 y le 1945, cun n’atenziun particolara al ciamp de transiziun/Durchgangslager de Balsan/Gries, ala perioda dl “Alpenvorland” y ales formes de resistënza zivila che é gnüdes praticades dala popolaziun. Le protocol prevëiga de plü scomenciadies de recort y de analisa di valurs fondamentai dla Costituziun taliana.
Chëstes é n valgönes dles scomenciadies planificades: ti pité ai scolars/ales scolares contignüs y materiai de cualité por l’aprendimënt dles materies storiches, svilupé stromënc didatics che conzed ince l’adoranza di social media y de internet, promöie le barat cultrual tres seminars y conferënzes y realisé material d’informaziun por studënc y insegnanc. Por la realisaziun de chëstes mosöres didatiches gnarál istituí n Comité tecnich-scientifich cun rapresentanc dles Intendënzes, dl’ANPI y cun consulënc y esperc.
rc
