Trafich | 20.02.2016 | 18:47

Proiec model ti raiuns dai schi: premiá Munt Seuc y Plan de Corones

Al é ince le coliamënt ferata-pista dai schi a Plan de Corones y la furnadoia Bullaccia sön Munt Seuc danter les bones pratiches premiades incö (ai 20 de forá) a Perca tratan n convëgn Arge Alp dediché ales staziuns dai schi. Le proiet Alpinski á orü ciafé sö i mius modí de sostenibilité, sconanza ambientala y mobilité alternativa.

Le convëgn internazional á proponü na reflesciun sön les mius pratiches pro les staziuns dai schi y á presenté i resultac dl proiet Arge Alp Alpinski, früt de passa dui agn de colaboraziun danter les Provinzies de Trënt y de Balsan, le Tirol, i Grijuns y la Lombardia. "Tl dagní ti gnarál dé na majera importanza al co arjunje saurí i raiuns dai schi y turistics respetan l’ambiënt", á dit Markus Pitscheider, diretur dl Ofize Implanc portamunt dla Provinzia de Balsan en rapresentanua dl assesur provinzial por la mobilité Florian Mussner.

Pro le convëgn á i reladus Hermann Knoflacher (Technische Universität Viena), Günther Suette (presidënt dl comité ambiënte OITAF Trasporc a föm), Helmuth Lamprecht (ex ad dl Grup Furnadoies tirolejes) y Corrado Diamantini (Université de Trënt) dit sciöche ara ciara fora tl setur di implanc dles strotöres dai schi, che é dër important por l’economia dles regiuns alpines. Ma tl Südtirol condüj i 371 implanc 130 miliuns de passejiers d’invern. Al é gnü baié dles mius soluziuns adorades por i implanc tl cheder alpin cun n’atenziun particolara al sparagn energetich, ala mobilité alternativa y al inserimënt ambiental.

Chisc faturs é stá importanc ince da valuté les mius esperiënzes tl concurs Alpinski-best practices a chël che al á tut pert 25 proiec (8 dl Südtirol). Danter chi bele fac él gnü premié l’implant Bullaccia cuntra Munt Seuc, che coliëia n lift da scagns por che che vá cun i schi y na telecabina por i peduns y se inserësc bun tl paesaje, y le coliamënt nominé ferata-pistes dai schi danter Perca y Plan de Corones. Tla categoria di proiec che vëgn planificá á davagné chël dl coliamënt danter Soraga y Moena y le raiun dai schi de Carezza, do l’implant preodü danter Pinzolo y Madonna di Campiglio tl raiun dai schi Pinzolo-Doss del Sabion.

rc

Galaria dales fotografies

Le coliamënt ferata-schi a Perca, un di proiec invatifs (Imaja: Plan de Corones)

La premiaziun Alpinski-best practices é gnüda organisada incö sön le Plan de Corones tl contest de n convëgn Arge Alp. (Imaja: USP/Zelger)