Desfá confins y colié les porsones: le plann 2016 dl sorvisc por la jonëza
I assessurs provinziai Philipp Achammer y Florian Mussner á presenté incö ai 24 de forá tratan na conferënza stampa tla sënta dl Sorvisc ai Jogn de Balsan i punc plü importanc di planns anuai por la promoziun di mituns y jogn di grups de lingaz ladin y todësch. La Junta á aprové da püch les döes deliberes.
Sussidiarité, volontariat, colaboraziun y professionalité: chisc é i cater pilastri che garantësc le bun funzionamënt dl setur dla promoziun dla jonëza tres strotöres y sorvisc aposta te Südtirol. Insciö ne vëgn la promoziun dl laur por y cun i jogn nia ma sostigní da n finanziamënt costant da pert dla Provinzia, mo ince dal prinzip de sussidiarité che ti dá na man lëdia ai Sorvisc ai Jogn pro sües ativités y programs y dal gran impëgn di volontars che é la fondamënta che fej funzioné döt le sistem. I assessurs competënc Florian Mussner y Philipp Achammer á presenté incö, ai 24 de forá, a Balsan i planns anuai de promoziun dl laur por la jonëza che é gnüs aprová da püch dala Junta provinziala. Ala conferënza stampa ál ince tut pert n valgügn rapresentanc dles categories.
„Por ci che reverda le grup linguistich ladin él sté meso da tigní indô le finanziamënt costant, ci che ne garantësc nia ma le bun funzionamënt dles istituziuns joniles de nostes valades, mo che porta ince para la realisaziun de tröc proiec y scomenciadies por y cun i jogn y les jones te Gherdëna y tla Val Badia“, á dit l’assessur por la promoziun di jogn Florian Mussner. Un di obietifs primars é chël da cherié tres de plü prospetives de laur y tëmp lëde tles valades ladines por i jogn y les jones, insciö Mussner. Na tematica zentrala por le 2016 - insciö l'assessur - sará insciö chëra da lauré te na manira ampla sön la chestiun dla pröma ciasa por ti presenté ai jogn dötes les poscibilités por la costruziun o la cumpra de na pröma ciasa, analisé la situaziun dificoltosa tles valades ladines y por ti dé jö n arat ince ala Junta. „N’atra funziun importanta dl laur cun i jogn sará ti proscims agn dessigü ince la costruziun de dialogh danter la sozieté cun les porsones che röia adalerch, por mët deplü en contat i zitadins cun lingac y cultures desvalies por che les generaziuns nöies eliminëis i confins atuai y por che al ne vëgnes nia plü fat sö de nüs“, insciö Mussner.
Le Laur por y cun la jonëza vëgn garantí te Südtirol en gran pert da na rëi capilara de istituziuns lëdies, da volontars engajá y da profescionisć. Le setur s’á svilupé dër tröp ti ultims 33 agn cun atualmënter n’oferta ampla de organisaziun y strotöres che pita na gran richëza de programs por i jogn da implí le tëmp lëde y da ester de aiüt te situaziuns de dificolté. „Le laur por la jonëza fej pert dl laur cultural y de formaziun dla Provinzia“, á splighé l’assessur Philipp Achammer, „y so laur é chël da ester presënc tles situaziuns de vita di jogn por ti dé consëis, i orienté y acompagné.“ Tres le prinzip dla sussidiarité él meso da reconësce i bojëgns di jogn por ti pité ala jonëza les ofertes che vëgn adorades le plü, insciö Achammer. Le suranstant dl Sorvisc Jogn „Balsan y raiuns vijins“ Gernot Psenner á recordé la gran importanza da sostigní i jogn tla vita da vigni de y ince da aprijé les ativités de volontariat. Michel Peer dl Jugendring á recordé ince le bun funzionamënt dl program pro la promoziun di jogn che é bele atif da 33 agn.
L’assessur Achammer á rengrazié düc i volontars y rapresentanc di volontars - indöt 83 suranstanc y 415 mëmbri di consëis – por sües bries tratan l'ann y ince ai sura 10.000 jogn, jones y adulc che se dá da fá tles organisaziuns joniles, ti Sorvisc ai Jogn y ti Zëntri y grups che se dá jö cun tematiches che reverda la jonëza. N rengraziamënt sintí ti vá ince ai 236 colaboradus a tëmp plëgn te chësc setur, insciö Achammer.
Por l’ann 2016 él gnü aprové tres le plann anual 300.000 euro por la promoziun de ativités y programs por le grup linguistich ladin y 128.980 euro por la realisaziun y l’aredamënt dles sëntes di Sorvisc ai Jogn tles döes valades. Implü él ince preodü n sostëgn por le program dles ativités dla Repartiziun Cultura y Intendënza scolastica ladina che reverda le Sorvisc jogn. Le plann anual por la promoziun dl sorvisc ai jogn dl grup linguistich ladin regolamentëia danter l'ater l’ampliamënt y le sostëgn finanziar dles infrastrotöres di jogn, la promoziun dles ativités, di proiec y di programs straordinars a bëgn dla jonëza. Implü se dá le plann ince jö cun le regolamënt sön les inrescides scientifiches, la conzesciun di contribuc promozionai y le program dles ativités di sorvisc ai jogn.
rc
Galaria dales fotografies
Retrat: OSP/Ingo Dejaco
