I parcs naturai chir junior ranger: iscriziuns dal pröm de merz inant
Ince chësc ann ará i mituns y les mitans danter i 10 y i 11 agn la poscibilité da tó pert ai cursc de „Junior ranger di parcs naturai“, na scomenciadia che vëgn metüda a jí chësc ann tl Parch natural Fanes-Senes-Braies a Al Plan de Mareo. Da indoman (01 de merz) pon se scrí ite.
L’Ofize provinzial Parcs naturai organisëia ince por chësc ann indô, adöm ales Lies da munt dla Val Badia, dl CAI y dl AVS Südtirol, le proiet „Junior Ranger Südtirol“, cun chël che al ti vëgn dé la poscibilité ales mitans y ai mituns danter i 10 y i 11 agn da imparé da conësce tla natöra, te na manira plajora y informativa, i aspec desvalies che reverda la sconanza dl ambiënt y dla contrada südtiroleja. La formaziun por ciafé le titul de „junior ranger“ döra indöt ot dis tratan i mëisc da ma cina setëmber. I dis dl curs é ai 13 de ma, ai 30 de jügn, ai 13 y 14 de lugio, ai 23 de lugio, ai 05 y ai 24 de agost, ai 07 y ai 11 de setëmber.
La formaziun da junior ranger vëgn pitada se baratan jö te düc i 7 parcs naturai: chësc ann vëgn la formaziun pitada dal Parch natural Fanes-Senes-Braies cun la sënta prinzipala a Al Plan de Mareo. Le program dla formaziun reverda l’orientamënt, la sciënza dles chertes, le pröm aiüt sö por munt, l’ecologia dl survival (suravire tla natöra), insec, la flora y la fauna dles munts, l’osservaziun dla salvarjina, anfibs y retii. Implü vëgnel metü a jí esperiënzes de scoverta direta cun ativités d’orientamënt y de pröm aiüt sö por munt cun le GPS. Tratan la festa de contlujiun, che gnará tignida ai 11 de setëmber dl 2016, podará i partezipanc, che á tut pert a almanco cinch dis de formaziun, pié do n diplom de contlujiun. I pici rangers nüs gnará daldô inviá a scomenciadies y proiec che reverda la proteziun dla natöra ince tl dagní. Por vigni grup él preodü 15 partezipanc.
I geniturs pó scrí ite i mituns y les mitans da indoman mertesc al 1. de merz dl 2016 inant. Por informaziuns plü monüdes por le curs prëibel contaté Matteo Rubatscher (zënter de vijites dl parch natural Fanes-Senes-Braies, tel. 0474 506120 info.fsp@provinz.bz.it).
Le program dl curs, che mët man ai 13 de ma, é desponibl sön internet tlican sön http://www.provinz.bz.it/natur-raum/themen/2087.asp. L’iscriziun costa 90 euro. Tl prisc él calcolé l’atrezadöra, la poscibilité da dormí, i pasć y la festa de contlujiun. An pó se scrí ite cina ai 30 de aurí.
rc
Galaria dales fotografies
Imaja: Ofize Parcs naturai
