Dala Junta: apoteches nöies, aproada la gradatöra
La Junta provinziala á aprové la gradatöra definitiva dla bandida por la daurida de 20 apoteches nöies (de chëstes öna n'apoteca provisora) sön le teritore südtirolej. Sis de chëstes gnará daurides a Balsan, döes a Maran y Porsenú. I partezipanc al concurs á sëgn 60 dis de tëmp por presenté recursc eventuai.
Indöt 83 é stá i partezipanc che á tut pert ala bandida por la daurida de 19 apoteches nöies y de öna na apoteca lëdia te döt le Südtirol scrita fora tl mëis de ma dl 2014. La comisciun de valutaziun, conscidran l’arat dl Ofize Afars legai dla Provinzia, ne á nia aprové 21 domandes por detlaraziuns cun mancianzes o falades. Les 62 domandes é insciö gnüdes ejaminades dal Ofize Raiuns sanitars y incö él spo gnü la löm vërda definitiva pro la daurida de 20 apoteches nöies ince da pert dla Junta provinziala. Dles 19 apoteches nöies nen él 6 preodüdes a Balsan, 2 a Maran y Porsenú, y öna ti Comuns de Bornech, Eppan, Kaltern, Lana, Laives, Ritten, Sarental, Schlanders y Ahrntal. En ajunta a chëstes él preodü na curida dla apoteca provisora de Kastelbell.
„Les apoteches é n punt fondamental dl proiet de reorganisaziun dl sistem sanitar dl Südtirol, deache ares é gonot le pröm punt de referimënt por la jënt atempada, cun problems de mobilité, o por les families y i pici mituns“, sotlignëia l’assessuria provinziala pro la sanité Martha Stocker. „La dorada dl iter de aprovaziun é sté dër lunch, mo chësc nia por gaujia dl’aministraziun provinziala, mo por le iter burocratich stabilí te chësc caje a livel statal“, insciö Stocker.
rc
