Dala Junta: mudaziuns al program de svilup rural
Na seria de mudaziuns é gnüdes fates al program de svilup dla lerch rurala por la Provinzia de Balsan, perioda 2014 – 2020. Do la löm vërda nezesciara dala Comisciun europeica á la Junta provinziala aprové incö (ai 8 de merz) la delibera che alda lapró. Danter les mudaziuns vëgnel ince inserí na premia ajuntiva por la verda dles vaces da lat.
Le program de svilup rural dla Provinzia autonoma de Balsan por la perioda 2014 – 2020 á sciöche fins prinzipai dantadöt da sconé y svilupé i ecosistems, da aumenté l’efiziënza dl’adoranza dles ressurses y ince da atué intervënc a bëgn dles arees svantajades tres i proiec leader. Cun l’Uniun europeica él sté meso da stlü jö positivamënter les tratatives por mudé n valgügn punc dl program cina al 2020, conscidran ince les problematiches particolares di raiuns da munt.
Do la löm vërda dla Comisciun europeica á la Junta provinziala aprové la delibera spezifica presentada dal assessur Arnold Schuler. Danter les mudaziuns vëgnel indô inserí la premia ajuntiva por la verda dles vacies da lat y implü vëgnel arbassé a un n hectar (denant nen êl dui) la spersa minima de coltivaziun nezesciara por avëi azes ales premies „a na manira che ince les piceres impreses pó fá domanda“, spliga Schuler recordan le contribut prezius dles pices aziëndes por la conservaziun dl paesaje. Les mudaziuns dl program prevëiga implü che la conzesciun dla premia por spersa vëgnes ampliada ince ales sperses laurades da aziëndes da paur che é defora dai Comuns dla Provinzia mo che confinëia diretamënter cun le Südtirol.
rc
