IPES, le diretur nü Palfrader: Impëgn por n’organisaziun moderna
Plü co 13mile abitaziuns cun 30mile abitanc, 222 colaboradus y na soma de 30 miliuns por costruziuns nöies y ressanamënc: chëstes é les zifres che é gnüdes presentades incö dal diretur general nü dl’Istitut por le frabiché alisiré IPES Wilhelm Palfrader. Incö (ai 09/03) s’á le diretur presenté ofizialmënter te süa inciaria nöia.
Wilhelm Palfrader é nasciü l’ann 1959 a Al Plan de Mareo y al laora al intern dl’aministraziun provinziala dal 1990 inant, daimpröma tl’Intendënza scolastica ladina, spo pro l’Ofize Apalc, spo ala direziun dl Ofize Espropriaziuns y dal 2009 cina al 2016 sciöche diretur dla Repartiziun Frabiché abitatif. Dal 1 de merz é Palfrader le diretur nü dl’Istitut por le frabiché alisiré IPES.
Le presidënt dl IPES Heiner Schweigkofler á sotrissé tratan la conferënza stampa de presentaziun dl diretur nü l’importanza soziala y la gran responsabilité aministrativa che ti speta a Palfrader: 13.347 abitaziuns cun 30mile abitanc, n volum d’afars de 51 miliuns de euro y n budget de 30 miliuns de euro metüs a desposiziun dala Provinzia, de chisc 15 miliuns por costruziuns nöies y 15 miliuns por ressanamënc. Indöt vëgnel fat te un n ann dal IPES presciapüch 171mile fatures y al röia adalerch 13.200 segnalaziuns por intervënc.
Tratan la pröma edema da diretur á Palfrader fat la roda por düc i ofizi y á dit che „le potenzial dl IPES é dër gran: le personal é motivé y se respidlëia cun l’Istitut. Cun le presidënt Schweigkofler sarál poscibl da organisé na gestiun moderna cun sorvisc atuai y d'öga por la popolaziun.“
Le diretur dl Departimënt Frabiché y Laurs publics dla Provinzia, Paolo Montagner, á tut pert ala presentaziun en rapresentanza dl assessur por le frabiché Christian Tommasini recordan l’importanza da renforzé les sinergies danter la Repartiziun Frabiché abitatif y l’IPES. Le vizepresidënt dl IPES Renzo Caramaschi á anunzie che dal 1 de aurí inant ne sarál nia plü a desposiziun por le Consëi d’aministraziun. L’inciaria de diretur general dl IPES é gnüda scrita fora l’isté 2015 cun na prozedöra de seleziun che á porté ala nomina de Wilhelm Palfrader tl mëis de novëmber dl ann passé. Süa inciaria é varënta cina da d’altonn dl 2017, sis mëis do la tomada dl Consëi d’aministraziun dl ënt.
rc
