Integraziun: Brosciüres de sostëgn ai geniturs y al personal didatich
Acompagné y alisiré l’intlujiun de mituns migranc tles scores ladines: chësc é le fin prinzipal dla brosciüra nöia „Educaziun tles valades ladines“ che é gnüda presentada da püch a Al Plan de Mareo y a Urtijëi dal Sorvisc de Consulënza psicopedagogica y por l’integraziun dl’Intendënza ladina. „L’integraziun é n valur important dla scora ladina y i proiec le desmostra“, dij l’assessur Mussner.
Daidé i geniturs y i mituns da s’integré tl sistem formatif ladin é un di fins prinzipai dl Sorvisc de Consulënza psicopedagogica y por l’integraziun dl’Intendënza ladina. Tl sistem scolastich ladin él scrit ite atualmënter tl ann de scora y scolina 2015/16 incër 135 mituns y mitans, scolars y scolares cun background de migraziun. Lapró röiel ciamó n iade tan de scolari olache un en genitur vegn da foradecá, chi che á bele la zitadinanza taliana, deache ai é bel’ n gröm d’agn tla Talia y i mituns adotá. „La situaziun atuala t’Europa nes mostra che le conzet de mendranzes é fondamental y che la scora ladina plurilinguistica é arjignada ca por ti dé na man ince ai mituns che röia da dalunc por vire chiló da nos“, á recordé l’assessur por la scora ladina Florian Mussner che á sotligné le rode de ejëmpl dla scora ladina ince tl contest dl’integraziun dantadöt por merit de proiec sciöche chël presenté a Al Plan y Urtijëi.
Integraziun y intlujiun: döes desfides danter scora y sozieté
„Ince sce le numer di mituns y dles mitans cun n contest de migraziun tles scores ladines ne é nia alt él impó important da ti dé aiüc y consëis d’ütl por l’intlujiun“, insciö Mussner che á rengrazié le Sorvisc de Consulënza psicopedagogica y por l’integraziun dl’Intendënza ladina por la realisaziun dl material didatich. L'intendënt por la scora ladina Roland Verra á ince recordé che la desfida dl'integraziun “restará tresfora atuala ince ti proscims agn y che la realisaziun de material d'informaziun y d'aconsiamënt é n aiüt important dantadöt por insegnanc y geniturs cun n background de migraziun“. L’ispeturia por l’integraziun Carla Comploj á sotrissé che la realisaziun de material d’informaziun é dër important ince por avijiné i geniturs da foradecá al monn dla scora ladina y al’organisaziun scolastica en general.
Informaziuns y spligaziuns: co funzionëia pa le sistem scolastich ladin?
La pröma brosciüra dal inom „Educaziun tles valades ladines“ contëgn consëis por i geniturs de scolares y de scolars cun n background de migraziun. La brosciüra é rica d’informaziun y consëis cun na descriziun dla scora ladina y dl sistem de formaziun, cun informaziuns importantes por i geniturs por ci che reverda l’iscriziun tles scolines y scores y cun consëis sön la gestiun dles situaziuns desvalies dl möt a scora. Al vëgn ince tematisé danter l’ater les incuntades di maestri cun i geniturs, les situaziuns poscibles de conflic y la chestiun dl’ora de religiun. Les brosciüres é scrites por ladin (dla Val Badia y de Gherdëna), por talian, todësch, urdu, arabich y spagnol y gnará spartides fora diretamënter dales scores y pó ince gní damanades do al Sorvisc por l’integraziun dl’Intendënza ladin. Les ilustraziuns al'intern dl codejel é gnüdes fates da Licia Zuppardi y i tesć é gnüs scric da Olimpia Rasom y Irene Costa.
Consëis por geniturs y insegnanc
Les secunda pert dl material didatich porta le titul de „Orientamënc por insegnanc y personal pedagogich“ y contëgn de plü consëis por i maestri y les educadësses por favorí y svilupé inant i mituns cun n background de migraziun y de co i integré le miú tl contest scolastich y tla sozieté en general. Les döes manifestaziuns de presentaziun é gnüdes abelides dala cornisc musicala adöm cun les scolares y i scolars dla scora elementara da Al Plan y da Urtijëi y les maestres Annemarie Mühlmann, Maria Kostner y Heidi Stuffer. A Urtijëi él ince sté n valgönes mames de mituns migranc che á arjigné ca y prejenté en chësta ocajiun n pice renfrësch etnich cun spezialités dal Marocco, dala Serbia y dala Siria.
Por plü informaziuns: Sorvisc por l’integraziun dl’Intendënza ladina (tel. 0471 41 70 12)
rc
Galaria dales fotografies
