Euregio Sport Camp 2016, iscriziuns cina ai 04 de aurí
Ince chësc ann vëgnel metü da jí dai 17 ai 24 de lugio l’Euregio Sport Camp, na scomenciadia ponsada por 60 mitans y mituns dai 12 ai 14 agn dal Südtirol, Tirol y Trentin por imparé da se consësce plü daimpró fajon sport y jüc deboriada. Le camp sará chësc ann a Malles, an pó ciamó se scrí ite cina ai 4 de aurí pro l’Ofize Sport y promoziun dla sanité.
Do le gran suzes dles döes ediziuns di agn passá a Baselga di Piné l’ann passé (Trentin) y a Kühtai tl 2014 (Tirol) vëgnel organisé chësc ann l’Euregio Sport Camp a Malles tl Südtirol dai 17 ai 24 de lugio por indöt 60 mitans y mituns dai 12 ai 14 agn (nasciüs ti agn 2002, 2003 y 2004) tl raiun dl’Euregio. Sön le program él de plü ativités sportives, dal jüch al palé, al badminton, la canoa o le kayak, mo ince cursc da balé le hiphop y la zumba. Implü él ince preodü workshops d’informaziun cun de plü esperc de sciënzes dl’alimentaziun, dla prevenziun cuntra le doping y dles formes d’alenamënt plü sanes y efiziëntes.
Por düc chi che ó tó pert al Euregio Summer Camp él ciamó poscibl da fá domanda cina ai 4 de aurí. Danter düc i partezipanc gnarál implü fat na ola dla fortüna cun la poscibilité da davagné na sojornanza debann. Chi che á bele fat domanda tres le fax dess prëibel contaté diretamënter Laura Savoia dl Ofize Sport y promoziun dla sanité, strada Kanonikus Gamper 1 a Balsan (sport@provincia.bz.it, 0471418349).
rc
