Dala Junta: aproades les diretives nöies por le trasport de paziënc
La Junta provinziala á aproé incö (ai 15/03) les diretives por le trasport tlamé „secondar“ di paziënc: te chësta manira vëgnel stlüt na locia legislativa y regolamenté le trasport de chi paziënc che mëss gní spostá te n’atra strotöra sanitara por avëi les cures che ti speta.
I trasporc regolamentá incö dala Junta provinziala ne prevëiga nia i caji de pröm aiüt y de apariziun de na maratia, mo indere i spostamënc di paziënc da n ospedal al ater o a n’atra strotöra sanitara por jí inant cun les cures y le tratamënt sanitar spezifich. Chësta sort de trasport di paziënc vëgn organisé te na manira mirada y acompagnada.
La Junta provinziala á insciö aprové sön proposta dl’assessuria por la sanité Martha Stocker les diretives nöies dl trasport tlamé „secondar“ di paziënc. L’assessuria á orü rengrazié te chësc caje le laur de preparaziun di rapresentanc dl’Aziënda sanitara provinziala, dantadöt la direziun sanitara y tecnich-assistënziala, i primars dla medejina de pröm aiüt, de anestesia, de terapia intensiva y de reanimaziun.
„I trasporc dal inom „secondars“ á na funziun importanta tl’assistënza sanitara, deache ai garantësc n passaje asvelt y zënza interuziuns dl’assistënza de porsones amarades te na manira gravosa, de vitimes de inzidënc o de paziënc che sofrësc de patologies croniches“, recorda l’assessuria Stocker. Le trasport vëgn tres acompagné da personal spezialisé y cun mesi de trasport aposta.
rc
