Olimpiades de talian a Roma: Lisa Verginer y Philipp Augschöll pro i mius
Indöt 84 partezipanc á tut pert en vëndres ai 18 de merz ala fasa finala dles Olimpiades de talian a Roma cun concorënc da dötes les Regiuns dla Talia, mo ince dal’Algeria, dala Grecia, dala Germania y dala Spagna. Por le Südtirol á tut pert Lisa Verginer da San Martin de Tor y Philipp Augschöll che é stá bugn da arjunje resultac demorvëia.
Dai 17 ai 19 de merz él gnü organisé chësc ann les Olimpiades de talian a Roma, na competiziun linguistica por mosoré les competënzes linguistiches de talian danter i studënc, organisada dal MIUR tl contest di Dis dl lingaz talian (Giornate della lingua italiana). I 84 studënc y les studëntes, che á podü tó pert ala fasa finala y mosoré sües competënzes linguistiches, é gnüs chiris fora da indöt 43.000 concorënc. La manifestaziun finala é gnüda daurida dala ministra por l’istruziun Stefania Giannini.
Dui é ince stá i finalisć che vëgn dal Südtirol: al se trata de Lisa Verginer da San Martin de Tor che frecuentëia le lizeum linguistich dl Zënter dles scores altes da La Ila y de Philipp Augschöll dl Istitut tecnich economich „Heinrich Kunter“ da Balsan. Do avëi passé la seleziun locala a Porsenú ái tut pert ala finala a Roma cun na proa scrita de trëi ores cun cater eserzizi desvalis, dala ciacia ala parora falada, ala naraziun de na storia, al rové ala stesöra de n test informatif y ala creaziun de n’intervista imajinara cun na personalité storica.
Lisa y Philipp á arjunt trami dui n resultat demorvëia y á podü pié do l'onoraziun sön la paladina d’onur „Scuola ufficiali Carabinieri“ a Roma. La direturia generala dl MIUR Carmela Palumbo y le comandat general di Carabinieri Tulio Del Sette ti á surandé le pest spezial por le davagn dles Olimpiades de talian sciöche secundo lingaz ala Provinzia de Balsan. Le pröm post ti é jü a Valentina Bevilacqua da Avellino tl categoria Senior y a Sara Persello da Udin tla categoria Junior.
I complimënc ai dui davagnadus Lisa Verginer y Philipp Augschöll ti é ince gnüs fac dai insegnanc y dales insegnates che i á acompagné a Roma, dantadöt conscidran le livel de dificolté dër alt dla proa y la gran concorënza.
Plü informaziuns sön Lisa Verginer pon ciafé chilò: http://www.olimpiadi-italiano.it/face2016_detail.php?p=Xw3Gy7OQMT
rc
