Dala Junta: partezipaziuns dla Provinzia, ok ala razionalisaziun
Razionalisé y reorganisé les partezipaziuns dla Provinzia tles sozietés, ti ënc y organisaziuns te n’otica de smendrimënt di cosć, mioramënt dl’efiziënza y de na maiú trasparënza. Da IDM al’Alperia, da Hospital Parking a Brennercom, i resultac dl plann presentá dal presidënt Arno Kompatscher é gnüs aprová incö (ai 22 de merz) dala Junta provinziala.
Le percurs dl proiet de reorganisaziun â metü man tl mëis de dezëmber dl 2014 cun l’aproaziun dla lege de stabilité che ti scriô dant ala Provinzia da presenté ala seziun regionala de control dla Curt di Cunc cina la fin de merz dl 2015 n plann anual de reorganisaziun y razionalisaziun dles partezipaziuns te sozietés, ënc y organisaziuns. Incö, mertesc ai 22 de merz y un n ann dedô, á la Junta provinziala fat n pröm bilanz y á ince aprové i resultac dl plann proponüs dal presidënt dla Provinzia Arno Kompatscher.
Danter les mosöres prinzipales nen él döes de granes: da öna na pert la nasciüda de IDM Südtirol, l’aziënda speziala dl’economia che á surantut les competënzes manajades cina sëgn dal TIS, dala SMG, da BLS y dal’EOS y dal’atra pert la fujiun danter SEL y AEW che á porté ala creaziun dla sozieté energetica unica Alperia. Danter les venüdes completades dala Junta él da nominé chëra dles cuotes de Hospital Parking, la sozieté che manajëia la plaza da parché i auti dl Ospedal da Balsan, y de Central Parking che á en gestiun la plaza di auti dan la staziun dl capolüch. Chësta ultima operaziun á porté tles casses dla Provinzia n davagn de püch sura i 400mile euro.
Implü él ince gnü deslié les döes organisaziuns dla Fondaziun Vital y dla Fondaziun por l’archirida y l’inovaziun, trames döes mëss ciamó stlü jö n seria de chestiuns formales cina la fin dl ann. De gragn vari inant él ince gnü fat por ci che reverda la situaziun dla Brennercom, cun la creaziun de na New.Co che se fistidëia dles chestiuns che reverda l’interes dla coletivité (ampliamënt y gestiun dla rëi dla fira otica por la banda leria) al intern de chëra che i ënc publics (Provinzia, Selfin, Asm Porsenú y A22) á la maioranza dles usc tl Consëi d’aministraziun. Ince sce al ne ê nia preodü dal plann anual é le Safety Park gnü integré al intern dla STA y les döes biblioteches provinziales dla Teßmann y dla Claudia Augusta fajará pert dles döes repartiziuns competëntes dla cultura todëscia y taliana.
Al é ince preodü tl 2017 la contlujiun dl’operaziun che reverda l’ARBO, la sozieté che se fistidëia dl proiet de ressanamënt dl’area dla staziun de Balsan, por chëra che al é preodü l’entrada de sozii privac. Da stlarí él ciamó la situaziun pro ci che reverda les partezipaziuns al intern dl aeroport de Verona (3,6 porcënt), dl marciá general de Balsan (10 porcënt) y di magazins generals de Balsan (20 procënt). Al é ince gnü sposté l’operaziun de venüda dles aziuns de Interbrennero y de A22 por le valur de 6,2 miliuns de euro por gaujia dla chestiun che reverda la prorogaziun dla conzesciun dl A22. La Provinzia planifichëia ince da vëne sües cuotes al intern dla banca d’investimënc Mediocredito (valur atual de 33 miliuns de euro), implü él gnü scomencé incö le percurs de nasciüda de na sozieté unica danter BLS y Südtirol Finance.
rc
