Dala Junta: finanziamënt por 8 films y documentars
La Junta provinziala á dé süa aprovaziun incö (ai 22 de merz) ala pröma pert de finanziamënc dl 2016 por le sostëgn de films y documentars che vëgn realisá tl Südtirol. I esperc y l’IDM Südtirol, l’Aziënda speziala por l’economia, á stabilí i pröms 8 proiec da sostigní tres le Fonds südtirolej dediché ala produziun de films y documentars.
Les condiziuns por ciafé n finanziamënt publich é chël che les produziuns televisives y cinematografiches reinvestësces tl Südtirol almanco le 150 porcënt de chël che ai á ciafé. Por le pröm call dl 2016 él gnü presenté 19 proiec cun la domanda do n finanziamënt provinzial. Do la valutaziun dla comisciun di esperc y dl’IDM Südtirol á la Junta provinziala aprové incö ai 22 de merz le finanziamënt de 8 produziuns cun zirca 1,9 miliuns de euro. La retüda economica por le teritore dl Südtirol di 8 proiec vëgn calcolé insciö a 2,8 miliuns de euro.
Al é preodü indöt 123 dis de produziun y de laur cun i aturs, esperc y fornidus de sorvisc südtirolej. „Al se trata de na fujina locala che tol ite indöt cincanta categories profescionales y che reverda sides i artejans co ince les impreses locales“, á ajunté Kompatscher. Döes produziuns aproades vëgn dal Südtirol, cater dal rest dla Talia, öna dala Germania y dala Svizra. Al é gnü confermé ince dala Junta le proiet „Un passo dal cielo 4“, la fiction de suzes dla Lux Vide ambientada tl raiun de Braies, Sanciana y Bornech. En chësc iade ne sarál nia plü ala pert l’atur Terence Hill.
Danter i films da segnalé él ince le film fantasy „Pip Fischer and the secret of Ötzi“ che gnará realisé a Balsan cun l’aturia Valeria Golino. Aladô dles diretives dla Junta mëss les produziuns garantí la reconësciment dl Südtirol sciöche location, fá referimënt al Südtirol o promöie artisć o ciases de produziun locales.
rc
