Dala Junta: cooperaziun al svilup, plü fonds y ressurses
La Junta provinziala á aprové incö le program 2016 dla cooperaziun al svilup: cina al 2018 gnará les ressurses finanziares aumentades de cotan. Por le 2016 él gnü inserí tl bilanz indöt 4 miliuns de euro cun n aumënt dl 50 porcënt dles ressurses tl confrunt dl ann passé. Danterater él preodü intervënc de sostëgn tl Lebanon y tla Iordania.
„Cun chësc aumënt important á la Junta provinziala orü cherié la basa por n finanziamënt adaté dles scomenciadies che vëgn organisades dai ënc no profit atifs tl setur dla cooperaziun al svilup“, á recordé le presidënt dla Provinzia Arno Kompatscher. Indöt él gnü presenté domandes de finanziamënt por 85 proiec.
Les formes de sostëgn da pert dla Junta provinziala é de plü: le 75 porcënt dl finanziamënt vëgn destiné a proiec de cooperaziun dles organisaziuns südtirolejes tl’Africa, India, Asia, America latina y Europa dl’Est y ai proiec de educaziun al svilup y ala sensibilisaziun dl conzet de mondialité sön le teritore südtirolej. Le 25 porcënt dl finanziamënt é indere gnü assegné por finanzié programs de svilup da plü agn dla Provinzia cun partners ti Paisc desvalis y cun organisaziuns internazionales, sciöche por ejëmpl tl Afghanistan, Burkina Faso, Uganda, Tanzania, Nepal, Bolivia, Ecuador y Capo Verde.
N valgügn ejëmpli de proiec che reverda la cooperaziun al svilup é le sostëgn che la Provinzia garantësc tl Nepal, do le tremoroz che á atoché le capolüch Kathmandu, por la costruziun de n zënter de proteziun zivila. Tl Afghanistan él indere preodü la costruziun de na scora por 1700 scolars. Implü él ince preodü n sostëgn a intervënc te arees de crisa, sciöche por ejëmpl ti gran ciamps cun profugs tl Lebanon y tla Iordania che é la conseguënza di conflic tla Siria y tl Irach.
N’atra priorité importanta é ince i proiec de scombatimënt cuntra la meseria y la fan dantadöt tles regiuns dl Sudan, dla Mauritania, dl Mali, dl Niger y dl Ciad. Dötadöm vëgn chisc proiec finanziá cun 1,2 miliuns de euro. N’atra pert dles ressurses 2016 gnará adorades por scomenciadies spezifiches tl setur dla sconanza dles mendranzes linguistiches y culturales destenüdes fora por döt le monn. La Provinzia mët implü ince a desposiziun ressurses finanziares ti caji de desgrazies cun n fonds aposta por intervënc de emergënza y de ressanamënt.
I obietifs dla Cooperaziun al svilup dla Provinzia por i proscims agn fej referimënt al’Agenda 2030 y ai 17 obietifs dl svilup sostenibl aprová dales Naziuns Unides a New York tl setëmber 2015. I obietifs nüs prevëiga le sostëgn dla promoziun dla sostenibilité economica, soziala y ambientala, le scombatimënt dla meseria, l’ampliamënt di dërc umans, la prevenziun de conflic y le sostëgn de prozesc che porta ala stabilisaziun y ala pesc.
rc
