Mobilité y tëmp lëde, l’EuregioFamilyPass vëgn arjigné ca
Amplié les funzionalités dl Südtirol Pass family por ti consintí ales familes da anuzé i mesi dl trasport publich local y da aprofité de reduziuns de prisc pro l’adoranza de strotöres por le tëmp lëde tl Tirol, tl Südtirol y tl Trentin: chësc é l’obietif prinzipal dl'EuregioFamilyPass. La Junta provinziala á aprové incö (22 de merz) le proiet dl layout dla cherta.
„La cherta nöia jará a remplazé le Südtirol Pass family atual: i ne orun nia cherié döes chertes doples mo aumenté y mioré les funziuns“, á splighé l’assessuria por les families Waltraud Deeg. Le proiet é gnü aprové incö (ai 22 de merz) dala Junta provinziala che á dé süa aprovaziun al layout dla cherta. „Les families cun mituns sot ai 18 agn ne podará nia ma rodé sön i mesi dl trasport publich local cun tarifes speziales, mo ince se aprofité de reduziuns y prisc arbassá pro n valgügn eserzizi comerziai y strotöres pro le tëmp lëde che fej para pro la scomenciadia tl Südtirol, tl Tirol y tl Trentin“, á sotligné l’assessur pro la mobilité Florian Mussner.
L’EuregioFamilyPass é n proiet che vëgn ince sostigní deplëgn dal presidënt dla Provinzia Arno Kompatscher che ajuntëia che l’EuregioFamilyPass á l’obietif da sostigní les families südtirolejes dal punt de odüda finanziar les motivan ince da anuzé les ofertes culturales y soziales te döt le raiun dl’Euregio. Le dërt da adoré l’EuregioFamilyPass á dötes les families che á la residënza tla Provinza de Balsan cun mituns sot ai 18 agn zënza conscidré i limic de davagn.
rc
