Incuntada Junta-Comuns: internet aslöm, energia, reformes
Le finanziamënt di laurs por l’ultima milia dla rëi dla banda leria, la venüda dl 10 porcënt de Alperia, i arac söi dessëgns de lege, les reformes istituzionales, les normes nöies sön l’armonisaziun di bilanc. Chisc é stá i temesc prinzipai dla sentada de tlausöra dla Junta provinziala cun le Consëi di Comuns.
„I laorun düc por le medemo obietif – á sotligné le presidënt Arno Kompatscher tratan la conferënza stampa – y chël é da ciafé les mius soluziuns por ti pité ai zitadins y ales impreses la cualité plü alta te döt Südtirol.“ Tratan l’incuntada, a chëra che al á ince tut pert i assessurs provinziai y i rapresentanc dl Consëi di Comuns cun a cé le presidënt Andreas Schatzer, él gnü rajoné de plü tematiches. Öna dles chestiuns prinzipales é stada chëra dl internet aslöm. „I laorun pro ciafé na soluziun unica por döt le teritore: nosta idea é chëra da realisé na rëi dla fira otica daverta, publica y capilara. I ne podun nia ma cherié l’infrastrotöra, mo i messun ince la mët sön le marcé“, á splighé le prësident dla Provinzia. Propi chësta é öna dles tematiches de discusciun danter la Provinzia y i Comuns, che á la responsabilité da realisé l’ultima milia de coliamënt. „I sun tl lauré por ti dé l’inciaria ala sozieté acorpada a Alperia te na manira da podëi s’anuzé dles sinergies y por garantí i sorvisc nia ma ti zëntri prinzipai mo ince ti raiuns rurai“, á dit Komptacher. Do la creaziun dla rëi ti gnarál damané ai manajadus privac da fá n’oferta unica por döt le teritore a na manira da ne avëi degönes desfarënzies sön döt le teritore provinzial.
„Al se trata de na situaziun interessanta por le dagní, mo atualmënter é ince i Comuns damaná da investí tla realisaziun dl’ultima milia“, á ajunté le presidënt dl Consëi di Comuns Andreas Schatzer. N sostëgn concret, da chësc punt de odüda, é preodü dala Provinzia. „Al é a desposiziun indöt 15 miliuns de euro sot forma de contribuc unatantum“, á splighé l’assessur por i ënc locai Arnold Schuler. N'atra tematica debatüda é stada chëra di arac nia obliënc dl Consëi di Comuns sön les leges provinziales. L’idea é chëra da amplié la tempistica por ti dé al Consëi di Comuns plü tëmp por fá les propostes. Por ci che reverda les reformes él por l’assessur Schuler „bele gnü fat tröp cun le ordinamënt finanziar nü, por l’isté gnarál ciamó arjigné ca la norma sön les unités aministratives.“
Le presidënt dl Consorz di Comuns Schatzer á sotligné che „la passaje de competënzes mëss ince gní acompagné dal trasferimënt dles ressurses nezesciares y le medemo dess ince avarëi por chi seturs olache al é preodü cosć ajuntifs por i Comuns, sciöche por ejëmpl pro l’assistënza por l’infanzia y la cura di seniors.“ Por ci che reverda l’energia á le presidënt Kompatscher confermé „de orëi vëne le 10 porcënt de Alperia dala Provinzia ai Comuns.“ Chësta tratativa gnará debatüda tles proscimes edemes danter Kompatscher y Schatzer che á sotligné che „le prisc dla cumpra de 164,4 miliuns é massa alt. I sun tl valuté de plü ipotejes de finanziamënt, tignin cunt ince dles ressurses finanziares implü che chësc setur podess ti porté tl dagní por le svilup dl teritore.“
rc
Galaria dales fotografies
Foto USP/Renè Tumler
