Dolomites UNESCO: portal web deboriada por le trasport publich
Mët a desposiziun n portal web deboriada pro le trasport publich tl teritore dles Dolomites UNESCO: chësc é le fin dl protocol d’intenüda sotescrit incö (ai 24 de merz) a Ampëz dal assessur Theiner tratan la reuniun dl CdA dla Fondaziun, tratan chëra che al é ince gnü segnalé l’andamënt straordinar dla homepage dles Dolomites UNESCO.
La mobilité sostenibla é stada la tematica prinzipala dl’incuntada dl Consëi d’aministraziun dla Fondaziun Dolomites UNESCO incö (ai 24 de merz) a Ampëz che é gnüda stlüta jö cun la firma dl protocol de nasciüda de na plataforma digitala che reverda i sorvisc dl trasport publich sön döt le teritore metü sot a sconanza. La plataforma é un di proiec che é gnü coordiné dal’Ofize Parcs naturai adöm cun l’Agenzia por la mobilité dla Provinzia de Blasan. L’idea é chëra de cherié na plata internet cun n motor de chirida unich por düc i coliamënc y iadi de dötes les cinch provinzies dles Dolomites UNESCO.
Incö, jöbia ai 24 de merz, é le protocol d’intenüda che portará ala nasciüda dla plataforma digitala gnü firmé dal assessur Richard Theiner, presidënt dla Fondaziun Dolomites UNESCO, dal assessur Florian Mussner y dai atri assessurs competënc dles atres provinzies interessades. La colaboraziun prevëiga le trasferimënt de düc i dac che reverda i coliamënc y i orars dles linees dles ferates y dles corieres. „Un di obietifs prinzipai dla Fondaziun é chël da promöie na mobilité ecosostenibla al intern dles Dolomites patrimone mondial UNESCO y i sun dla minunga che chësc portal pois ester n mesum modern, efiziënt y asvelt por ti pité ai zitadins dötes les informaziuns nezesciares por l’adoranza dl trasport publich“, insciö Theiner.
Tratan la reuniun dl CdA dla Fondaziun él ince gnü confermé la creaziun de na cartina nöia sön les Dolomites UNESCO por düc i apascioná dl jí sö por munt y implü él ince gnü nominé le Comité scientifich al intern de chël che la Provinzia de Balsan sará rapresentada da Roland Dellagiacoma, ex diretur dla Repartiziun natöra y paesaje. Les Dolomites patrimone UNESCO atira ince n gran interes sön internet. „Dai dac de Google Analytics él gnü registré che danter les plates web dles arees sot a sconanza é les Dolomites al secundo post pro la cumpëda de tlics, ma do le Grand Canyon. Sön twitter é i aboná ai tweets de Dolomites UNESCO ince söporjö 10mile“, dij Theiner.
rc
