Südtirol2Go, verjiun nöia dla app por le trasport publich
Ara á inom Südtirol2Go la verjiun nöia dla app por smartphone (bele conesciüda sciöche Südtirol To Go) a desposiziun por düc i anuzadus dl sorvisc de trasport public dla Provinzia de Balsan. Danter les novités plü interessantes él da ciafé trates spezifiches, informaziuns plü detaiades söles tarifes y ajornamënc sön orars y intardiades.
„Nia ma la consultaziun di orars, mo ince l’iter dles architades, la programaziun prezisa dla trassa, la cartina geografica y les informaziuns sön les tarifes o söi orars dl trafich é i contignüs ajorná dla verjiun nöia dl’app por smartphone por düc i anuzadus dla mobilité publica“, spliga l’assessur por la mobilité Florian Mussner. La verjiun nöia dla app, che cina dan da püch â inom Südtirol To Go, se tlama da sëgn Südtirol2Go. La app é desponibla te de plü lingac, nia ma por les variantes ladines dla Val Badia y de Gherdëna, mo ince por talian, todësch y inglesc.
Cina sëgn é l’app dl’Agenzia por la mobilité gnüda desciariada plü de 40mile iadi y ara vëgn adorada regolarmënter da söporjö 34mile utënc. Chëstes zifres desmostra aladô dl assessur Mussner che l’informaziun digitala tres l’app „é na plataforma de consultaziun importanta por düc chi che é söl iade tl Südtirol zënza auto o che renunziëia ala mobilité privata por favorí chëra publica. L’otimisaziun dles informaziuns por l’utënt mëss avëi la priorité plü alta y en colaboraziun cun i partner dl proiet sun tl lauré por monitoré y mioré tresfora le sistem.“
Öna dles novités plü importantes é ince la poscibilité da podëi programé la trassa dl iade dër avisa: l’anuzadú pó insciö chirí fora le meso dl trasport plü d’ütl, le percurs plü asvelt, cun le numer plü bas de cambiamënc o ince cun le percurs da jí a pe plü cört. Plü informaziuns é ince gnüdes inserides por ci che reverda les tarifes, cun la app che mostra le valur mesan dla tarifa dles chertes singules y dles chertes dl Südtirol Pass y dl Südtirol Pass family.
N pice triangul segnalëia ince les indicaziuns por ci che reverda les variaziuns dl orar, intardiades y atres informaziuns d’ütl söi coliamënc cun les corieres y les ferates. Sce le triangul é cöce spo ó chël dí che l’informaziun é dër importanta o atuala, le simbol ghel o bröm indere segnalëia che la noela á manco importanza. Cun Südtirol2Go él ince poscibl da salvé les opziuns de chirida y l’indicaziun dles architades sön la cartina geografica tres la funziun „Around Me“. La verjiun nöia dla app é atualmënter desponibla por Android y iOS, tosc gnarál ince a se le dé l’ajornamënt por Windows Phone.
rc
